Lafaek News—Komunidade munisípiu Dili hamutuk 60 hetan kapasitasaun pesoal kona-ba inspetor sanitária hodi halo sensibilizasaun ba komunidade sira atu kumpri regra protokolu Organizasaun Mundial Saúde (OMS) hodi prevene prevensaun moras Covid-19.
Diretora Jerál Prestasaun servisu saúde, Odete da Silva Viegas, moras pandemia ne’ebé mak mosu ne’e presiza ema hotu nia apoiu iha parte hotu nune’e bele halo prevensaun ba surtu Covid-19 ida-ne’e
“Moras pandemia Covid-19 ne’ebé mak mosu, ne’e la’ós Ministériu Saúde nia responsabilidade de’it, maibé ne’e presija responsabilidade husi partes hotu-hotu, tan ne’e mak ohin ita hotu marka prezensa iha ne’e atu konkretiza ita nia servisu ne’ebé mak di’ak liu tan ba ita nia komunidade,” esplika
Diretora Jerál Prestasaun servisu saúde, Odete da Silva Viegas, iha nia diskursu iha Palacio da Sinzas, Kaikoli, Kinta (01/07/2021).
Diretora Jerál ne’e hatutan, partisipantes sira ne’e sei ba iha Suku no Aldeia ka fatin ne’ebé mak ema halibur malu barak liu hodi haree sira kumpri ka lae, no sensibiliza informasaun ba medidas preventiva sira hanesan uza maskra no fase liman, ida-ne’e mak sira nia knaar atu haree no halo mudansa ba implementasaun iha komunidade sira.
Iha fatin hanesan, Reprezentante Eskuadra PNTL Munisípiu Dili, Delfin da Silva, hatete, formasaun ne’e importante tebes ba partisipantes sira, atu sai hanesan inspetor ne’e la’ós servisu ida ne’ebé mak fasil, servisu ida-ne’e ne’e atu ba eduka ema konsola ema hodi kumpri regras Covid-19 nian.
“Ita boot sira atu ba halo prevensaun no mós kontrola, servisu ida-ne’e ne’e la fasil tebes, tanba ita hodi buat di’ak ba mós ita mak la di’ak, ita hodi buat la di’ak ba ne’e ita la di’ak liu tan, tanba buat ida servi povu ne’e defisil, tan ne’e ita hotu hamutuk hodi eduka ita nia povu atu kumpri regras sira ne’ebé mak iha ona,” dehan Delfin
Nia informa, tuir nia observasaun komunidade maioria mak uza maskra, maibé distansiamentu sosiál mak sai problema boot, tanba familia 1 ema na’in 10 ba leten ne’e atu organiza distansia sosiál ne’e difisil tebes.
Ho nune’e, reprezentante Autoridade Munisípiu Díli, Antonio Moniz Calau, dehan, Agradese tebes ba formasaun pesoál inspesaun sanitaria tanba foin primeiru hahú iha Timor-Leste.
“Ami konsidera katak atividade ida-ne’e ne’e importante tebes, oinsá atu reforsa ita-nia ekipa, iha fulan liu ba ministériu estatal estabelese tan ekipa liña frente suku, aldeia e ho prenzensa ekipa inspesaun sanitaria ita espera kata sira-nia forsa balun oinsá atu fó sensibilizasaun ba ita-nia komunidade sira kona-ba prevensaun Covid-19 iha munisípiu Dili”, dehan Nia.
Observasaun lafaek news sita membru inspesaun sanitária ne’ebé tuir formasaun iha Palásiu das Cinzas hamutuk 60 husi postu administrativu haat kompotu husi postu Vera-Kruz, Nain Feto, Dom Aleixo no Kristu-Rei.
Jornalista : Sandi Belo
Asisten Editór : Egidio Nono
