Lafaek News—Organizasaun noun-governamentál Fundasaun MAHEIN (FM) konsidera atuasaun Oknum Polísia Nasionál Timor-Leste, ne’ebé halo agresaun fíziku ba negosiante Nu’u iha Tasi-Tolu iha loron 23/05/2021, orientasaun husi komandante, tanba komandante la interven imediata ba iha akontesimentu ne’e.
Pesizadór Fundasaun MAHEIN, Sancho Xavier,hateten Fundasaun MAHEIN nia observasaun kona-ba oknum PNTL ne’ebé halo agresaun fíziku ba negosiante nu’u ne’e, hanesan abuzu kompeténsia no aplika sala regra estadu emerjénsia.
“Fundasaun MAHEIN nia haree ne’e loloos ne’e iha akontesimentu ida violasaun direitus umanus ne’e,”dehan pesikizadór Fundasaun MAHEIN, Sancho Xavier, ba jornlista lafaeknews, iha kna’ar fatin bairo Grillos, 24/05/2021.
Tanba iha regra EE nian la bandu sidadaun ka negosiante ida atu faan sira atu halo atividade negósiu iha ámbitu EE ne’e, haree ba atuasaun brutalidade oknum PNTL nian ne’ebé akontese horseik ne’e MAHEIN hanesan abuzu kompeténsia husi oknum sira ne’ebé iha instituisaun PNTL nian laran no komete violasaun direitus umanus hasoru sidadaun sira.
Hodi dehan, membru polísia na’in rua ne’ebé komete violasaun direitus umanus iha Tasi-tolu, lolos komandante iha terrenu ne’e tenke halo intervensaun, la’os komandante haree no tenta halo fali protesaun ba oknum polísia na’in rua ne’ebé komete violasaun direitus umanus.
“Tanba tuir lei disiplinar loloos ne’e labele, porque ita hare husi kazu ne’e rasik la’os de’it komandu iha terrenu ne’e de’it mak halo protesaun ba membru PNTL rua ne’e, maibé iha komandu sira iha nasionál mós halo tenta atu proteje oknum na’in rua ne’ebé komete violasaun ne’e ita haree iha pajína ofisiál PNTL nian komandu tenta fo sala ba no justifika katak sidadaun ka negosiante ne’e mak sala,” katak
Sancho afirma, husi akontesimentu durante aplikasaun estadu emerjénsia ne’e kauza mós husi Parlamentu Nasionál liu-liu komisaun B trata asuntu seguransa, la hala’o nia funsaun ho di’ak, la tun halo fiskalizasaun ho di’ak hodi hatene populasaun nia kondisaun, no husu ba parlamentu nasionál karik iha situasaun ida ne’e bolu komandu PNTL no vise Ministru Interior, atu solusiona kazu violasaun direitus umanus ne’ebé komete husi PNTL.
Jornalista : Egidio Nono
Editor : Agapito de Deus
