Lafaek News—Saturlina Gomes da Costa, idade 45, dada is atu sustenta oan na’in neen nia eskola no responde aihan uma laran, moris hanesan ema faluk, laiha família tau matan, maske uma nia kondisaun la funsiona ona, ai-rin 6 ne’ebé tonka hela uma barraka prega ho kalen 40 resin lahuk no dodok ba da-daun, hein de’it baku fila ba rai.
Realidade moris iha mundu ne’e, bainhira ema sei kiak, uma at no hahán laiha maluk mós laiha, maibé ikus nia moris di’ak ona, iha uma di’ak no buat hotu iha, maluk komesa barak, maibé iha tempu ida kuandu ema ne’e moris iha tristeza laran laiha ema ida mak ba hasee hodi husu netik nia kondisaun moris atu bele fó tulun.
Istória ne’ebé hakerek iha paragrfu daruak husi notisia ne’e mensiona katak bainhira o sei kiak maluk mós laiha, ohin loron hetan ona moris di’ak maluk komesa barak, hanoin ida ne’e atu dezafia ema ida-idak nu’udar umanu no Timor oan sira labele hein de’it família, maibé hakbseik ba inan faluk Saturlina atu konsidera netik nia halerik.
Tanba ne’e, uma ne’ebé mahon ba faluk ne’e ho oan na’in neen, hateke husi kalen ne’ebé didin haleu ho fruzun hafutar ho kuak too iha uma kakuluk, ai-rin hamutuk 6, iha ne’ebé lahuk no dodok ona, sente laiha seguru bainhira tuur iha uma laran, fiu instalasaun ahi latan lerek iha rifas leten, maske perigu bae ma nia vida, rai rahun suar iha uma laran dada iis la di’ak, sente iha uma laran hanesan uam ne’ebé abandona tinan barak nia laran.
“Buat ne’ebé ha’u presiza tebes mak foos ho mina atu sustenta ha’u oan na’in neen, tanba ha’u nia kapasidade la too ona atu sustenta sira iha situasaun ida agora,” haktuir Saturlina ho matan-wen hafoin vizita jornalista lafaek news iha aldeia Lemorana, suku Dare postu administrativu Vera-Kruz, munisípiu Dili.
Saturlina orijen husi aldeia Poelau suku Soro, postu administrativu Ainaru Villa, munisípiu Ainaru, laiha maluk ida tau matan ba nia moris, maibé feto ne’ebé faluk no aten brani hodi hasoru dezafius, maske familia husi nia kaben Ezequel Soares ne’ebé husik hela nia ho oan nain neen iha 2017, inklui família husi ninian rasik dez-liga nia ho oan na’in neem maibé forsa iha nia fuan la nakdoko hodi buka moris oinsá bele sustenta oan eskola inklui aihan uma laran.
Iha entrevista jornalista Lafaek News ho inan faluk Saturlina, ko’alia lian la sai no matan-wen sulin hodi haktuir uluk nia kaben matebian Ezequel sei moris, sente buat hotu di’ak moris ho kontente nesesidade uma laran la falta, matebian antes ne’e servisu iha Timor Plaza nu’udar operadór fortklip komesa husi 2012 too 2017, matebian husik ona nia kaben ho oan nain neen hodi fila hikas aman maromak nia kadunan santa.
Iha entrevista kuaze minute 25, inan faluk ne’e ko’alia ho maten-wen, kondisaun uma la di’ak ona, tanba ai-rin 6 ne’ebé tonka uma ne’e lahuk hotu ona no ai hirak ne’ebé prega kalen lahuk namtate ona, bainhira anin boot bele baku fila hanehan labarik sira iha uma laran.
“Uma ne’e ha’u katuas oan (matebian) mak halo iha 2012 too agora tinan 10 ona, uma ne’e rin ho ai de’it, agora lahuk ona, uma ne’e tiding hela iha rai leten, foin lalais udan boot ne’e ha’u foti ai tonka husi parte leten atu labele monu,” haktuir faluk ne’e.
Faluk ne’e espresa ba lafaek news katak laiha osan atu harii fali uma foun no sosakalen foun, husik ba uma ne’e monu de’it ona labarik sira mate de’it iha laran ona, tanba família sira m’os la interese ona atu mai haree netik oan na’in neen.
Faluk Saturlina mesak sustenta oan na’in neen hanesan, Adelino da Costa idade (22) nu’udar mane dahuluk konesege finaliza estudu iha nivel ensinu sekundáriu, maibé la kontinua ba universidade tanba inan faluk laiha osan, Jaime da Costa (20) eskola too de’it iha ensinu primaria labele kontinua tanba osan laiha.
Nune’e, oan datolu nian Feliciano da Costa halo nia estudu too de’it iha klase 6 iha ensinu primaria paradu tanba osan laiha atu sosa fasilidade eskola nian, Cidália Soares idade (17), la eskola, Novi Luduvina da Costa Soares idade (14), ba da-daun kumpre hela estudu iha ensinu pre-sekundáriu Farol ho klase II, no Alexandre da Costa seidauk bele eskola tanba foin halo idade tinan (4).
Jornalista/Editór : Agapito de Deus
