RAEOA-Lafaek News- Feto hamutuk 18 no Mane 37 livre ona hosi kuarentena obrigatóriu durante loron 14 iha Rejiaun Administrative Espesiál Oekusi Ambenu (RAEOA).
Sekretáriu Rejionál Trata Asuntu Saúde RAEOA, Manuel da Costa, informa pasiente ne’ebé durante ne’e hala’o kuarentena obrigatóriu livre ona no idak-idak fila ona ba uma hodi hamutuk fali ho família.
“Ohin abitante ne’ebé livre hosi kuarentena obrigatóriu hamutuk 55, kompostu hosi feto 18 no mane 37 pesoa. Hosi totál ne’e kuarentena Oe Upo hamutuk 33 pesoa feto 17 mane 16, kuarentena EDTL iha Inur Sakato hamutuk 20 mane hotu, no mós Otél Lifau hamutuk na’in 2, feto 1 mane 1,” dehan SRTAS Manuel ba Jornalista Lafaek News, iha Kuarentena Otél Fitun Lima (BINTANG 5) Oe Upo, kuarta (06/01).
Nia hatutan, tuir loloos ema hamutuk 60 mak ohin livre hosi kuarentena maibé tanba na’in lima seidauk kumpre loron 14 entaun nafatin hela iha kuarentena hodi halo tratamentu.
“Ohin livre totál tuir loloos 60 pesoa, maibé ohin sai de’it 55. Na’in lima mak sei nafatin hodi kumpre kuarentena 14 Dias,” dehan Manuel
Entretantu iha fatin hanesan Prezidente Autoridade Rejiaun Administrative Espesiál Oekusi Ambenu (RAEOA), Arsenio Paixaun Bano, fó apresiasaun ba pesoa hirak ne’ebé livre ona husi kuarentena no husu atu nafatin kumpre regra ministériu saúde ninian.
“Parabens ba frontline sira hotu no mós ba maluk sira hotu, loron 14 ne’e la fasil maibé ne’e di’ak ba ita hotu no obrigadu tanba ita hotu kumpre ita nia obrigasaun hodi tama ba iha kuarentena,“ tenik nia
Enkuantu iha RAEOA kazu Pozitivu nafatin mantein hamutuk na’in tolu mak sei baixa iha sala izolamentu Ospitál Curacao, Fatu Suba, RAEOA.
Jornalista : Egídio Nono
Editór : Ezequias Tomás
