Lafaek News—Polísia Nasionál Timor Lorosa’e (PNTL), hahú halo atuasaun rigorozu hasoru ema ne’ebé mak la obedese ba regra estadu emerjénsia hodi kaptura lori ba komandu jerál prosesa tuir lei.

Asaun ne’e Polísia Nasionál Timor Lorosa’e (PNTL), foti bazeia ba dekretu governu kona-ba medida ba ezekusaun estadu emerjénsia ne’ebé renovadu hosi dekretu prezidente repúblika Nu. 73/2020 loron 30  fulan Dezembru responde ba pandemic COVID-19.

Ba ema sira ne’ebé viola sei assume responsabilidade kriminál tuir regra ne’ebé hakerek iha kódigu penal. Tanba tuir kódigu penal artigu 244 kona-ba dezobediénsia, hatete katak ema ne’ebé la halo tuir mandadu lejítimu komunikadu regulamentu ne’ebé autoridade ka funsionáriu kompetente maka sei hetan pena prizaun tinan 3.

“Ohin. Polísia halo ka foti asaun katak sé mak la uza máskara iha fatin públiku polísia tenke atua lori sira ba iha komandu jerál hodi investiga sira,” Portavós PNTL Arnaldo Araújo ba jornalista iha Bebora Dili, kuarta semana ne’e.

Hatutan nia, daudaun ne’e seidauk bele informa na’in mak kaptura hodi prosesa tuir lei tanba membru sira sei hala’o hela knaar iha terenu.

“Ha’u seidauk hatete ema na’in hira mak PNTL kaer ona, tanba agora membru sira sei hala’o hela servisu iha terenu orasida lorokaik mak ita foin hatene númeru hira mak PNTL foti asaun ba sira ne’ebé la uza máskara bainhira la’o iha estrada públiku,” informa nia

Ikus nia argumenta, komandu PNTL nafatin fo atensaun ba komunidade sira atu uza máskara bainhira la’o sai, evita halibur malu no distansiamentu fíziku pelumenus metru 1, kuandu komunidade kontra maka parte PNTL sei foti asaun tuir dekretu governu ne’ebé iha.

Jornalista: Orlando Magno

Editór       : Ezequias Tomás