Lafaek News—Venedora Rozita sente triste lori produtu lokál Has ho Kulu husi postu administrativu Bazartete, munisípiu Likisá mai merkadu Taibessi fa’an la folin estragus soe ba lixu.
Negosiante Rozita Lobato
Maski nune’e servisu ne’ebé todan bainhira Iha tuku 5 loraik loron-matan monu, Rozita prepara produtu lokál hanesan, kulu no has enxe iha karon hodi hein kareta husi Bazartete nian tula tun mai Dili hodi faan iha terminal Tasi-tolu atu hetan netik $1 dollar ka $2 dollar hodi responde presiza uma laran no ba oan sira nia eskola.
Rozita Lobato Kolomau (48) husi aldeia Kutulau, postu administrativu Bazartete munisipiu Likisá, sai husi nia hela fatin aldeia Kutulau loraik tuku 5 too iha Dili tuku 8 kalan no toba de’it ho produtu lokál iha dalan ninin too kabun hamlaha foin hetan karreta hodi tula mai too iha terminal Tasi-Tolu.
Rozita espresa, haas no kulu ne’ebé nia lori mai Dili, nia sosa husi viziñu sira karon ida $3.50 no nia mai fan fali iha Dili fuan 7 sentavus 25, no kulu sosa haat sentavus 50 no mai fan fali ida sentavus 25, maibé too loraik ema la sosa lori fila-fali ba Bazartete hodi fo han fahi.
“Ha’u triste tanba sasán ne’ebé lori ema la sosa dala ruma ha’u nia osan inan mós la too, depois selu ba kareta husi Bazartete mai Dili, kuandu sasan barak ha’u selu $12 dollar ba mai, karik sasán oituan ha’u selu $10 dollar ba mai,” espresa Rozita ba jornalista Lafaek News ho oin triste iha terminál Tasi-tolu Dili, kuarta semana ne’e.
Objetivu Rozita nia atividade negósiu fan kulu ho has ne’e atu sustenta oan nain 8 feto lima no mane tolu, nain haat mak eskola no nain haat seluk forma ona uma kain, nune’e ekonomia uma laran la sufisente atu haree oan eskola no sosa hahan ka nesesidade sira seluk ne’ebé presiza.
“Ita iha osan barak ne’e tenke badinas no terus hodi fila liman, se lae ita la han no hemu, ha’u nia kaben mós kondisaun la d iak sofre hela moras muta ran, entaun nia labele halo buat ida no hein ho nia beioan sira iha uma, ha’u mak ba mai fila liman hodi hatan ba nesesidade uma laran no oan sira eskola,” katak Rozita.
Ikus liu, Rozita Lobato dehan, inan-aman la eskola ona, oan tenke eskola, inan-aman fan sasán iha merkadu, oan sira tenke matenek hodi kontribui ba dezenvolvimentu nasionál.
“Ha’u bele fan kulu ho has, maibé ha’u lakohi ha’u nia oan sira fan fali iha aban bainrua, ha’u hakarak sira tenke eskola, maski ha’u kiak osan laiha , importante ha’u nia saúde di’ak hodi buka osan hodi sustenta sira,” nia hakotu.
Jornalista : Juvita dos Santos
Editora : Nelya Barros
