Lafaek News—Bankada Congresu Nasionál Rekonstrusaun Timor(CNRT), dúvida ho ezekutivu halo alterasaun ba projetu lei sistema ezekusaun orsamentu jerál estadu (OJE) 2020, hodi extende husi loron 15 dezembru ba loron 17.
Eis PPN atual deputadu bankada CNRT, Arão Noé de Jesus da Costa Amaral, hateten regras ida-ne’e estabele mai kedas kuandu aprova lei kona-ba oramentu jestaun finanseira fixa kedas katak ate 15 dezembru kada anu sistema tenke taka, signifika prosesual administrasaun sira to’o de’it dia 15 de dezembru, maibé pagamentu sira ne’ebé vistu ona bele halo pagamentu to’o iha loron 28 de Fevereiru tinan tuir mai.
“Problema ne’e iha tempu tanba regra hateten ona katak kuandu to’o iha loron 15 dezembru kada tinan ne’e sistema no prosesu sira ne’e tenke taka ona, kompara ho tinan sira liu ba ne’e dezembru salariu hodi halo pagamentu sira ne’e sai hotu ona, maibé agora rona dehan governu altera sistema ne’e maibé bazeia ba saida ha’u hanoin ne’e ita la kumpre tihaona regras ne’ebé estabelese ona,”dehan Arão Noé.
Nia reforsa, kona-ba alterasaun ba sistema ezekusaun refere tuir loloos parlamentu nasionál mak iha kompetensia atu halo alterasaun depois mak governu ezekuta
Hatan ba kestaun ne’e, Vise Prezidente Parlamentu nasionál, Maria Angelina Sarmento, salienta nia parte seidauk iha informasaun kona-ba asuntu refere, maibé kona-ba orsamentu jerál estadu 2020 nian ne’ebé governu halo alterasaun ba prosesu sistema nian.
“Ha’u hanoin ha’u presiza check lai dala ruma governu iha razaun tanba ita hatene orsamentu duodésimu foin aprova iha fulan Outubro Novembru-dezembru 2020, dala ruma difikulta governu iha prosesu ezekusaun atu bele halo pagamentu ba obrigasaun sira kompremisiu sira karik tanba ida-ne’e maibé ha’u check lai,”dehan V-PPN ne’e.
Enkuantu horseik 16/12/2020, governu liu husi reuniaun konsellu ministru (KM), aprova ona projetu governu kona-ba alterasaun dahuluk ba dekretu númeru 14/2020, loron 23 de outubru no ezekusaun OJE 2020, ne’ebé fó biban atu extende loron ezekusaun to’o 17/12/2020 tanba servisu barak mak tenke rezolve hanesan Custo Produtu Vendida (CPV) tenke rezolve atu bele jere sasán ho formal no organizadu.
Jornalista : Egidio Nono
Editora : Nelya Barros
