Lafaek News—Komandu Nasionál Timor-Leste (PNTL), munisipiu Dili obriga sidadaun ida ho inisial JA ho familia tama kuarentina tanba suspeitu JA tama ilegal mai Timor-Leste depois hela hamutuk ho familia nain 10 iha uma ida.
Komandante Munisipiu Dili, Superintendente Xefe Henrique da Costa informa, Horseik 26/01/2021 mais ou menus tuku 04 loro-kraik komandu munisipiu Dili hetan xamada husi ekipa konzunta COVID-19 nian katak ema ida tama ilegal depois hela subar iha area Kristu Rei.
Henrique dehan, Hafoin simu xamada nia haruka kedas ekipa pratrolla eskuadra kristu-Rei ba kedas iha família ne’ebé subar suspeitu JA ne’ebé tama ilegal iha loron 10 liu hamutuk ho familia iha aldeia Kakeu -Laran suku Bekora postu administrativu Kristu Rei Munisipiu Dili.
“Ita nia ekipa konjunta obrigamente foti sidadaun ilegal JA ho familia nain 10 iha uma ne’ebé nia hela hamutuk, horseik PNTL lori kedas ba tama kuarentina iha tibar,” Dehan Superintendente Xefe Henrique ba jornalista iha nia knaar fatin kaikoli Dili, Kuarta 27/01/2021.
Bainhira sira kompleta loron 14 iha kuarentina, tui mai parte nasionál sei halo investigasaun ba sidadaun JA atu halo identifikasaun tuir prosesu normal.
“Ema ne’e Feto Timor oan ho idade 35, maibé ita sei buka tuir tanba ita seidauk hatene nia agora sidadaun Timor ka sai tiha ona sidadaun indonesia nian,” nia konfuzaun.
Henrique afirma, apela ba públiku tomak katak, iha nia nasaun viziñu númeru moras COVID-19 aumenta bei-beik, tan ne’e husu ba sidadaun hotu karik familia balun husi Indonesia tama mai orienta sira ba hasoru parte saúde atu sira bele kumpri ba iha kuarentina.
“Familia sira labele subar maluk balun ne’ebe tama mai tanba karik sira lori moras ne’e tama entaun moras COVID-19 sei hadaet ba familia no ema hotu ne’ebe besik nian nune’e mos moras ne’e bele domina iha ita nia rai laran,” Komandante ne’e hakotu.
Jornalista : Orlando Magno
Editora : Nelya Barros
