Lafaek News—Família matebian Francisca Gama husu governu atu dingifika tau netik serku haleu matebian nia rate sunu tau netik kruz no lilin, hanesan ho matebian Armindo Borges, ne’ebé mate iha Vera-Kruz ne’ebé hakoi ho dignidade no la’o tuir nafatin protokolu OMS
Reprezentante família Matebian, Francisco Ximenes, hateten nia parte hakruuk tebes ba regra Organizasaun Mundial Saúde no Ministériu Saúde (MS), maibé nu’udar ema Timor oan iha ninia kultura hodi hameno netik nia ropa tradisionál ruma hanesan tais antes tau nia ba iha kaixaun hodi hatama ba rai kuak.
“Ami husi Família matebian Francisca Gama hakruuk ba regra no protokolu husi OMS nian, maibé ami iha lamentasaun lubuk ida, hanesan sentimentu umanu ami tenki ko’alia sai, Francisca mate nu’udar ema Timor oan iha ninia kultura nusa mak la hameno netik nia ropa tradisional ruma hanesan tais antes tau nia ba iha kaixaun, maibé ida-ne’e la’os protestu ba governu,” esplika Família Matebian Francisco Ximenes ba jornalista sira iha CCD hafoin enkontru hotu ho SIJK, Sexta (16/04/2021).
Nia konta, durante matebian nia mate, husi Sentru Integradu Jestaun Krize(SIJK) ho governu prepara ona matebian nia kaixaun maibé husi família nia kruz ida hanesan simbolu ida hatudu dehan Francisca hakoi duni iha fatin ne’eba no nia moris iha data hanesan ne’e no nia mate iha data hanesan ne’e, maibé ida-ne’e la akontese, no husi família hakruk nafatin ba protokolu husi OMS, hamriik dook kuaze 200 metru,
“Ami família la prepara lilin ho ai funan ida, tuir kultura husi Baukau nian, no mate hanesan ne’e, nia família ho nia oan tenki fo ultimu homenajen ba nia inan maibé ida-ne’e mós la akontese,” katak nia.
Francisco mo husu ba governu tanba iha simitériu ne’eba simitériu foun, no ema ruma mak mate tanba Covid-19 tanba ne’e sujere ba Governu atu halo serku netik ba mate bian Francisca ninia rate atu animal sira la bele sama no halo aat, depois de tina 4 ou 6 família sei foti fila fali ninia restu mortais hodi ba haloot iha ninia moris fatin atu halo selebrasaun tuir kultura ninian, no iha loron 20 agora fulan abril sei ba vizita ninia rate hodi tau ai funan sunu lilin no harii mós nia krus,
Iha fatin hanesan Koordenadór Forsa Tarefas ba Prevensaun no Mitigasaun Surtu Covid-19, Rui Maria de Araújo, husu deskulpa ba família matebian Francisca Gama, informa, hanesan ekipa teknika ne’ebé servisu iha terenu ami husu deskulpa ba família matebian, SIJK kumpriende família ninia lamentasaun no kestaun sira ne’ebé família sira hateten ekipa SIJK sei kombina atu halo hamutuk.
“Ami hanesan ekipa teknika ne’ebé servisu iha terenu ami husu deskulpa ba família matebian, ami kompriende família ninia lamentasoens no kestoens sira ne’ebé mak família sira hateten ami sei kombina atu halo hamutuk, hanesan sira dehan tau tais no tau ninia krus kontempla hotu ona iha prosedimentu,” dehan Rui
Koordenadór ne’e afirma, SIJK sira rekoiñese lakunas sira ne’e hotu no sira sei halo buat hotu ne’ebé mak sira bele atu nune’e la bele repete tan lakunas sira hanesan ne’e iha tempu tuir mai
Jornalista : Sandi Belo
Editór : Egidio Nono
