Lafaek News—segunda (15/03/21), família matebian ida husi munisípiu Bobonaru tula sai mate ida husi Ospitál Nasionál Guido Valadares (HNGV), ho de’it karreta Gran Max lori ba Bobonaru.
“Ohin ita boot haree rasik mate isin tula de’it ho kareta Gran Max atu ba Bobonaru,” haktuir autoridade seguransa ne’ebé destakadu iha entrada João Paulo II Tasi Tolu hafoin pasa revista ba karreta Gran Max ne’ebé tula mate isin husi HNGV ba munisípiu Bobonaru, segunda (15/03/21).
Iha prosesu pasa revista ne’e observasaun lafaek news nota família sira haktuir razaun la tula mate isin ho karreta ambulánsia ne’ebé governu prepara, tanba preukupa liu ba karta autorizasaun polísia hodi halo viajen ba Bobonaru, nune’e mate isin tula de’it iha Gran Max ho xapa matrikula A.17-425.
Kareta tula mate isin ne’e hetan lisensa viajen husi Sentru Intengradu Jestaun Krize (SIJC), tanba ne’e too iha auto-stop iha Tasi Tolu, familia ida tuun husi karreta hodi hatudu Gia de marsa ba polísia sira hafoin hetan autorizasaun hodi sai husi Sidade Dili ba munisipiu Bobonaru.
Iha parte seluk bainhira jornalista husu ba parte seguransa ne’ebé halo pasa revista ba karreta Gran Max ne’e relata, ohin iha kareta laran ne’e mate isin atu tula ba bobonaro parte Kemak nian.
Entretantu loron bai-bain mate isin hotu-hotu ne’ebé sai ona husi Ospitál Nasionál Guido Valadares Dili naturalmente hetan ajuda husi Ministériu Solidaridade hodi tula ho ambulánsia lori too iha uma matebian nian, maibe situasaun ne’ebe akontese ba familia ne’e pasiensia aluga karreta privadu hodi tula mate isin ba Bobonaru.
Jornalista : Acacio Pinto
Editora : Nelya Barros
