Lafaek News—Forum Advokásia Munisípiu Bobonaru lamenta ho fenómena ne’ebé akontese iha munisípiu Lautém, Polísia Nasionál Timor Leste (PNTL) eskudra postu administrativu Tutuala kaptura negosiante Bobonaru-oan na’in 43, submete ba auto-karantina husu atu liberta tanba komunidade komersiantes sira nia rezidénsia atuál iha Dili.
“Ami hakarak informa ba públiku katak , negosiante sira ne’ebé mak ba fa’an iha Lautém, sira husi Dili sira hela kleur ona iha Dili hodi hala’o sira nia negosiu no haleu iha teritóriu Timor laran tomak, la’os husi munisípiu Bobonaru maka ba fa’an iha Lautém,” hatoo husi portavoz forum advokasia munisípiu Bobonaru, Casimiro Sodi do Rego, ba jornalista liu husi konferénsia imprensa iha restaurante Resto Kafe suku Raifun postu Maliana munisípiu Bobonaru foin lalais ne’e.
Portavoz dehan, liu husi via telephone hodi kontaktu ba maluk negosiante ne’ebé polísia kaptura iha munisípiu Lautém, katak negosiante hirka ne’e nia rezidénsia atuál iha Dili.
“Ami mós kontaktu ona husi via telephone ba negosiante sira ne’ebé mak hetan kapturasaun husi PNTL Lautém, katak sira haraik an tebes ba parte PNTL, tanba sira nia diresaun fa’an sasán no residénsia atuál iha Dili no husi Dili mak ba fa’an sasán iha Lautém,” tenik porta vos.
Negosiante sira ne’e hahú enfrenta problema tanba sasán eletrónika balun komesa aat, no laiha osan atu sosa hahan hodi konsumu.
“Sira ho fuan tanis hodi informa mós katak sira nia sasán ne’ebé fa’an ema seidauk sosa no sira nia sasán eletróniku balu at ona, sira sente lakon sira nia osan laiha, no sira nia osan laiha atu sosa hahan ba haan, maibé parte PNTL sira la konsidera sira da-daun ne’e enfrenta hela hamlaha kuaze loron 6 ona,” dehan nia.
Entretantu, parte saúde sira husi munisípiu Lautém ne’ebé halo teste ka foti sampel ba sira too agora nunka tau matan ba sira, nune’e FAMB husu ba parte PNTL munisípiu Lautém atu liberta vendedores sira ne’ebé maka oras ne’e kaptura hodi hatama ba auto-karantina, husu mós ba sosiedade sivíl sira hotu atu nafatin akompañia prosesu ne’e to’o remata hodi liberta vendedores sira hotu hodi sente liberdade.
Jornalista : Rita Moniz
Asisten Editór : Pedro de Almeida
