Lafaek News–Estudante Universitáriu Timor Lorosa’e (EUTL) alerta ba Tribunal Rekursu (TR) atu deklarasa ba públiku kona-ba revogasaun lei pensaun vitalisia ne’ebé antes ne’e halakon ona liu hosi lei númeru 7/2025 loron 29 fulan Setembru 2025.
Portavoz EUTL Natalizio Nunes Martins hateten tribunal rekursu nudar orgaun soberanu no hanesan estadu ida ne’ebe administra justisa reprezenta Povu no independente hodi halo justisa ba Povu, tan ne’e EUTL husu ba Tribunal atu deklara konstituisionalidade ba lei númeru 7/2025, tanba EUTL konsideira lei ne’e fo moris diak ba eis deputadu, governante no titulares sira.
“Hanesan Ita hotu hatene Lei pensaun mensal Vitalisia ne’ebé povu liu hosi EUTL luta ba halakon ona hosi lei númeru 7/2025, loron 29 fulan Setembru depois hetan promulgasaun hosi Prezidente Republika tama iha vigor hodi halakon total no haree ba ida ne’e EUTL husu ba Tribunal atu deklara konstituisionalidade ba lei númeru 7/2025 atu publiku bele hatene,” Portavoz EUTL Natalizio Nunes Martins, ba jornalista sira iha konferensia imprens, sesta (07/11/2025).
Hafoin lei pensaun vitalisia hetan promulgasaun iha loron 24 fulan Outubro 2025, liu hosi diálogu ho PDH fo sai katak kuaze benefisiáriu nain 30 hatama ona pedidu ba PDHJ hodi husu hatama pedidu fiskalizasaun abstrata
“Husu ba tribunal atu halo fiskalizasaun ba ida ne’e tanba, ami la koñese 30 pesoas ne’e see, tanba durante ne’e ami seidauk iha komunikasaun ho sira, maibé hakarak hateten katak ema sira ne’e lakohi servisu atu sustenta nia moris hakarak tuur de’it iha uma hodi goja orsamentu jerál estado ne’ebé tuir lolos investe ba setor seluk ne’ebé fo benefisiu ba povu hotu la’os ba grupo ida ka rua de’it, tan ne’e ami nia pozisaun klaru katak lei pensaun mensal vitalisia ne’e konstituisional,” portavoz EUTL ne’e akresenta.
Entretantu antes ne’e benefisiariu balun halo interpretasaun oi-oin ba revogasaun LPV ho razaun rua katak lei foun ne’e labele halakon direitu adkiridu, tanba konfiansa protesaun no armónia sosial inklui lei ne’e labele aplika ba kotuk, tanba viola prinsípiu noun-retroatividade iha K-RDTL, maibé razaun refere la konsege konvense PN ho PR ikus mai PN aprova no hetan promulgasaun hosi Prezidente Repúblika .
Jornalista : Natalino Lopes
