Lafaek News—Koordenadór Battala kampu grupu Timor-oan Tane Malu, Herculano Vicente Asala, informa distribuisaun nesesidade bázika hanesan foos ho mina no supermi ba estudante ne’ebé hela iha kost atinje ona atus ida resin iha munisípiu Dili.
Koordenadór baze ekipa Tane Malu, esplika asaun solidariedade ne’e foku liu ba estudante sira ne’ebé inan-aman dook iha munisípiu, no iha Dili hela iha kost hodi hala’o sira nia estudu iha universidade sira iha Dili laran no halerik ba osan no hahán iha situasaun serka sanitáriu ne’e.
“Iha terenu ita hetan maluk balu dala ruma loron ida ka rua komesa kastigu kabun la han tanba inan aman atu haruka osan mai liu husi mosan ka fatin seluk la di’ak tanba da-daun ne’e estadu implementa hela serka sanitáriu entaun difisil atu manda osan ba sira ne’ebe hela kost,” afirma Herculano Vicente Asala ba Lafaek News, tersa (23/03/21).
Nesesidade ne’ebe Herculano ho nia ekipa distribui tuir kriteria kada ema ida hetan pakote ida kompostu husi supermi sedaap, manutolu masin, mina inklui foos saka ida.
“Razaun tanba ita lakohi iha ukun aan ida ne’e Timor oan ida iha kotuk, maibé ita hotu tenke iha oin, ho ida ne’e mak ami nia intensaun, maibé laiha intensaun seluk,” Asala fundamenta.
Estudante ne’ebé simu ona nesesidade báziku tuir lista atinje ona atus ida resin (100 ital), maibé seidauk kobre hotu tanba estudante barak mak hela kost hodi eskola iha universidade sira hanesan, UNDIL, UNPAZ, UNTL, UNITAL no IOB.
“Apoiu ida ne’e la’os ha’u mesak maibé ho ita nia maluk sira seluk hamutuk mak ita identifika alista sira hela kost ne’ebe iha susar laran hodi fo apoiu ba sira,” nia esplika.
Tuir nia katak, públiku komesa halo interpretasaun sala ba asaun karidade ne’ebé ekipa Sura Mós Ho Ha’u IHa Tempu Ukun An ho Tane Malu halo, maibé apoiu ne’e laiha klasifikasaun ka intensionalmente, nu’udar Timor-oan labele husik maluk balu halerik iha situasaun ida ne’e.
“Ema balu nia interpretasaun ba iha polítika, maibé ami laiha intensaun ba polítika, tanba ami fahe nesesidade ne’e la haree ba kor A ka B, maibé haree ba rai ida ne’e mesak timor oan,” Asala reafirma.
Herculano akresenta katak, iha atividade distribuisaun nesesidade ba estudante hasoru mós difikuldade, tanba foos ho mina inklui supermi tula de’it iha motor hodi lori ba estudante sira iha kost.
Jornalista : Orlando Magno
Editora : Nelya Barros
