Lautem-(Lafaek News)—Diretór kompañia Salvasaun Lospalos Zelindo joão Lay, kestiona governu lokál Lautém loke dalan ba emprezáriu husi Baukau inklui Dili distribui foos MTCI tama to Lautém, maski emprezáriu Lautém-Oan rasik prontu atu halo distribuisaun foos iha Lautém.
Emprprezáriu Lautém-Oan ne’e sente triste bainhira haree situasaun ne’e, signifika governu lokál la valorize o ignora emprezáriu lokál iha Lautém hodi fo oportunidade fali ba emprezáriu husi munisípiu Baukau ho Dili.
“Ha’u mós asiste kareta ne’e tama mai Lospalos ami mós hakfodak uitoan ami husu sira mai husi ne’ebé sira dehan mai husi Dili, ida ne’e mak sai dúvidas ami kona- ba regra ne’ebé implementa hela ba iha Timor-Leste laran tomak, foin lalais ita hetan informasaun katak munisípiu sira bele ba Dili bainhira ita hetan ona karta autorizasaun husi SIJK atu nune’e tun ba Dili, bainhira ami ba trata dokumentu to agora seidauk hetan resposta husi munisípiu Lautém nian, katak bainhira mak ami bele ba Dili tula foos, maibé derepente de’it kareta Dili nian mai fa’an foos iha ne’e, sira dehan katak tanba ema Lospalos mak husu pedidu ba iha nasionál mak bele lori foos mai ne’e,” katak emprezáriu Salvasaun Losplaos, Zelindo João Lay ba jornalista sira postu Lospalos, (19/03/21).
Entretantu diretór kompañia salvasaun Lospalos ne’e hatoo kestaun ne’e bainhira nia rasik haree kompañia Baukau nian ida hetan autorizasaun husi administradór postu administrativu Lospalos Tadio Lopes iha loron 9 fulan Marsu 2021, ho nia rekomemdasaun ba kompañia ne’e hodi tula foos ba fa’an iha Lospalos ho folin $12,50, kada 25 kilo grama, ho kuantidade saka 500.
Iha fatin hanesan diretór kompañia Lealura Unipesoal Lda, Grabiela da Conceição Boavida, justifika katak nia kompañia hetan autorizasaun husi administradór postu administrativu Losplaos hafoin tula foos ba fa’an iha Losplaos.
“Ami mai fa’an foos MTCI iha Lospalos ne’e , karta ne’e ha’u sei lori ba CLN hodi urus tan surat, ha’u nia karta ne’e autorizadu ona entaun ha’u lori foos husi Dili mai fa’an iha Lospalos vila, ha’u mai fa’an foos iha Lospalos no ha’u entrega karta sira ne’e ba aseita husi komandante PNTL Lautém, no ha’u aprezenta mós karta ba polísia eskuadra Lospalos nian hodi fa’an foos MTCI iha Lospalos, ha’u nia kompañia durante tinan tolu mak suplay foos MTCI mai iha Lospalos vila,” Gabriela relata.
Entretantu too notisia ne’e hatun lafaek news Lautém seidauk iha konfirmasaun ba administradór postu Lospalos tanba halo hela servisu seluk no sei tenta konfirma hodi publika fali iha loron tuir mai.
Jornalista : CN.Lautem
Ediora : Nelya Barros
