Lafaek News—Estudantes benefisiarius husi Institutu Superior Cristal (ISC) hamutuk 279, lansa komunikadu imprensa relasiona polítika IX governu nian ne’ebé muda bolsa hakbiit ba bolsa parsial.
Portavos ISC, Anita de Jesus Brito, iha konferénsia imprensa akresenta, edukasaun nu’udar direitu báziku ba Timoroan hotu hodi bele asesu husi pre-primáriu to’o ensinu superior ne’ebé estipula iha lei inan konstituisaun RDTL, artigu 59, alende ne’e mós iha artigu 16 kona-ba universialidade no igualdade, iha ne’ebé hateten sidadaun hotu iha lei nia oin, nomós iha direitu no obrigasaun hanesan labele halo deskriminasaun ba ema ida tanba nia kulit, rasa, estadu sivil, seksu, orijen etníku, pozisaun sosial no ekonómiku.
“Edukasaun núdar fatór ida ne’ebé importante tebes hodi produs rekursus umanus ne’ebé sai hanesan riku-soin Timor-Leste nian ne’ebé garante sustentabilidade iha ambitu prosesu konstrusaun estadu, nune’e ami husu ba IX governu konstituisional kria polítika publika oioin hodi hakbiit timoroan hotu atu asesu ba edukasaun, atu nune’e ema hotu tenke hetan matenek iha nia rai rasik bele kontribui ba desenvolvimentu nasional,” Anita subline.
Nia dehan, Dekretu lei nú 13/2020, 15 de Abril, kona-ba regulamentu FDCH no diploma ministerial nú 9/2021, 10 de Março, VIII governu konstituisional oferese bolsa ho tipu integral ka hakbiit ba estudante ne’ebé kategoria inan-aman laiha kbiit, tanba objetivu husi bolsa ne’e rasik atu tulun ami kbiit laek nia-oan hodi asesu ba ensinu superior iha rai laran, no dadus ne’ebé FDCH, fó sai iha loron 30 fulan Abril tinan 2024 katak estudante sira ne’ebé asesu ba bolsa hakbiit daudaun ne’e eskola iha ensinu superior públiku no privadu hamutuk 16 ho total estudante 3.030 no espesifikamente ba ami bolsa hakbiit iha ISC total 279.
Sorin seluk estudante ISC, Octaviano Mendonça, salienta katak, ho bolsa integral ka hakbiit tulun tebes ami kbiit laek nia oan sira bele asesu ba ensinu superior, tanba estudu iha kapital Dili, laos deit selu eskola, maibé presiza sosa ai-han, selu kost, selu bemo, sosa livru, pulsa internet, print, foto kopi nomós nesesidade seluk ne’ebé bele fasilita estudante kbiit laek ho diak bazeai ba kontratu tinan lima.
“Infelizmente ho polítika IX governu nian ne’ebé lidera husi sua exelensia Kay Rala Xanana Gusmão, liuhusi ministeriu relevante no fundu desenvolvimentu kapital umanu (FDCH), ho baze diploma ministerial nú 11/2024, loron 7 fulan Fevereiru, ne’ebé deside iha konsellu ministru halo mudansa ba bolsa hakbiit ba fali bolsa parsial, desizaun ida ne’e tuir ami injustisa tebes no la tulun ami kbiit laek nia oan sira hodi asesu ba ensinu superior iha Timor-Leste, tanba muda bolsa hakbiit ba bolsa parsial laos difikulta estudante kbiit laek nia oan sira atu aprende ho diak, maibé iha konsekuénsia seluk mak lori ami kbiit laek nia oan sira hotu tama ba rai kuak, ho nune’e ami estudante bolsa hakbiit ne’ebé hamahan-an iha ISC totalmente la konkorda no la asina karta kontratu foun husi bolsa hakbiit muda ba parsial ne’ebé FDCH atribui ona kada universidade ho data ne’ebé determinadu”. Octavio konta.
Nia hatutan, desizaun refere nia konsekuénsia mak daudaun ne’e estudante bolsa hakbiit enfrenta problema hanesan laiha finansiamentu atu selu alojamentu, transporte, print, fotokopi, ai-han no nesesidade basiku sira seluk, alende efeitu seluk mak hanesan estudante bolseiru hamutuk rihun ida resin abandona ona sira nia estudu, tanba kestaun laiha kapasidade finanseiru ne’ebé bele tulun sira hodi hala’o prosesu aprendizajen ho diak.
“Ho kondisaun hirak ne’e, ma kami nu’udar povu kbiit laek nia oan hanesan benefisiariu sente lakon esperansa ba kontinua ami nia estudu iha banku universitariu, tanba mudansa kontratu ne’ebé la afavor ba ami bolseiru kbiit laek, nune’e ami estudante husi bolsa hakbiit ISC, husu ba presidente konsellu administrasaun fundu desenvolvimentu kapital umanu sr. Gastão Fransisco de Sousa, atu halo anulasaun ba diploma ministerial nú 11/2024, loron 7 fulan Fevereiru, ho emidiatamente”. Octaviano Mendonça hakotu.
Jornalista : Crispin de J. Amaral.
Editor : Agapito de Deus
