Lafaek News– Loron 6 Dezembru 2021 – Estadus Unidus no Timor-Leste sei realiza ezersísiu konjunta Cooperation Afloat and Readiness Training (CARAT) husi loron 6 to ‘o 15 fulan-Dezembru. Ezersísiu militar ida ne’ e sei haklean liu tan parseria seguransa EUA no sei hahú ho ro’o USS Charleston iha Timor-Leste.
Durante ezersísiu ne ‘e, membru Forsa Defeza (F-FDTL) hamutuk 20 no membru Polísia Nasionál (PNTL) nain 10 sei partisipa iha treinamentu lubuk ida iha ro’o laran USS Charleston. Formasaun ne’e sei foka liu ba hametin kooperasaun no hasae koñesimentu kona-ba navegasaun tasi nian, enjeñaria, manutensaun ba ekipamentu tasi nian, no tratamentu médiku emerjénsia nian. Ezersísiu ne’ e sei inklui mós formasaun kona-ba direitu internasionál tasi nian, inklui esforsu sira atu kombate tráfiku umanu. Membru Korpu Mariña EUA nian sei hamutuk ho ezersisiu CARAT hodi apoia treinamentu maneuvór no kombate urbanu ho membru F-FDTL sira iha Hera hahu husi loron 11-15 fulan Dezembru.
Estadus Unidus orgullu tebes halo parseria ho F-FDTL hodi dezenvolve Timor-Leste nia kapasidade iha área seguransa marítima, asisténsia umanitária no resposta ba dezastre,” dehan Enkaregadu Negósiu Embaixada Estadus Unidus nian Tom Daley. “Ezersísiu ida ne ‘e reprezenta ita-nia kompromisu atu hametin parseria ne’ ebé metin ho Timor-Leste, ne ‘ebé hetan abut husi valór demokrátiku, Estadu Direitu no Direitus Umanus ne’ ebé ita partilla ba malu.”
Ezersísiu CARAT harii iha parseria seguransa entre EUA no Timor-Leste ne’ebé buras ba bebeik, liuliu kompromisu Estadus Unidus nian ho orsamentu millaun $10 atu hamutuk ho governu Timor-Leste reabilita aeroportu Baucau. Liuhusi kriasaun Komponente Aéreu ida, projetu ne ‘e sei fó asisténsia ba F-FDTL no sei tulun Governu Timor-Leste hodi monitoriza di’ ak liután nia territóriu marítimu, hodi hatán ba dezastre naturál sira no promove dezenvolvimentu ekonómiku.
Estadus Unidus mós hala ‘o ezersísiu militár anuál hamutuk tolu ho F-FDTL no membru servisu Timoroan barak iha Estadus Unidus ba edukasaun lian Inglés no profisionál militár nian. Aleinde ne’ e, Estadus Unidus Amérika nia Navál Seabees harii no reabilita ona klínika no eskola liu 100 iha Timor-Leste hodi ajuda harii futuru ida ne ‘ebé di’ ak liu ba Timoroan sira, kompleta projetu sira ho valór liu millaun $ 50 durante tinan 10 nia laran.
Media : USA
Editor : Agapito de Deus
