Lafaek News–Ema sivil utiliza armas (kilat boot) tama asalta komunidade kiik ida nia uma iha Nasuta aldeia Terelau, suku Ulmera postu administrativu Bazartete, munisipiu Likisá, Sesta (29/04/2022 )iha tuku 10 kalan hodi obriga labarik nain lima iha uma laran buka kilat atu entrega ba grupu armadu ne’e.
Akontensimentu ne’e mosu iha 10:13 oras kalan OTL, grupu deskonesidu ida kompostu husi ema nain 4 lori kilat boot ho kareta Honda FIT kór silver la uza xapa matríkula, kareta ne’e para dook husi uma refere hodi la’o ain helik nakukun ba asalta komunidade kiik José Martins nia uma.
Fidelio Ramos nu’udar sasin husi akontesimentu ne’e haktuir, ema deskonesidu nain 4 ne’e uza armas kompleta taka oin metin ho lian siak katak ordem husi komandante kilat Mauleto nian subar iha ne’e hela haree entrega agora.
Ordem husi komandante,’’ katak ema ida husi grupu deskonesidu ne’e ba sasin Fidelio Ramos iha sábadu tuku 10 iha Nasuta.
Fidelio Ramos informa, situasaun ne’ebé akontese iha kalan bainhira labarik nain haat toba dukur hela, derepente ema deskonesidu nain 4 ne’e baku rahun odamatan no sobu janela hodi tama obrigatoriamente ba uma laran hodi buka kilat tuir objetivu grupu deskonesidu refere.
”Uma nain ba tiha lia barlake, hela de’it labarik nain lima mak iha uma laran, eletrisidade mate nakukun, derepente ema tama hodi obriga labarik sira buka kilat, ema sira ne’e dehan kilat ida subar hela iha uma ne’e,”katak Fidelio.
Entretantu, Iha uma laran, iha ema nain lima, kompostu, Renato Unamet de Jesus (22), hetan baku dala ida iha ulun, Elviano de Jesus Martins (19) hetan baku dala tolu, kaer lori haleu uma laran tama sai kuarta hotu hodi hatudu katak subar kilat iha uma laran, lori too kotuk fila-fali foin husik, Epifania de Jesus Ribeiro (19), Antonito Martins Soares (12), Renato ho Nivio ema deskonesidu hirak ne’e kaer sira nain rua latan iha rai atu nune’e hodi husu buat ne’ebé sira subar iha uma laran, depois grupu deskonesidu ne’e dehan ordem husi komandante.
Sasan hirak ne’ebé estraga iha momentu asalatu ne’e mak baku rahun odamatan no sobu janela, no dudu motor hamrik iha motor leten hodi haree iha uma leten katak saudozu Mauleto (eis petisionáriu) nia kilat subar hela iha vítima José Martins nia uma, tuir informasaun ne’ebé lafaek news asesu husi família vítima sira katak, família vítima sira sei lansa konferénsia imprensa hodi hatoo sira nia lamentasaun ba orgaun kompetente hodi halo investigasaun ba aktus husi grupu deskonesidu lori kilat ba hatauk ema povu kiik iha oras kalan.
Jornalista : Acacio Pinto
Editor : Agapito de Deus
