Lafaek News—Ekonomia familia la-suporta, Januario Soares deside halo atividade negosiu no lakhoi atu dependente de’it ba inan-aman maibé esfórsu no buka rasik hodi sustenta estudu no mós nesesidade uma laran.
Januario Soares nu’udar estudante husi Institutu of Busines (IOB), fakuldade ekonomia, departamentu siensia ekonomia estdudu dezemvolvimentu iha ne’ebé semester tolu, hare’e ba kondisaun moris familia nian obrigadu tenke faan duni sasan iha merkadu Taibesi.
“Ha’u hili atividade negosiu tanba haree ba ekonomia familia nian tun, ama-apa mós idade komesa avansa ona, ita boot ona labele dependente liu ba inan-aman, tenke buka rasik nune’e ajuda fali inan aman,” dehan Negosiante Januario Soares ba estajiariu lafaek news iha merkadu taibesi foin lalais ne’e.
Nia dehan, hahú faan sasan hanesan xinelus, sokas, pasta, xapeu ne’e iha tinan 2017 to’o ohin loron, no iha situasaun pandemia Covid-19 máka rendimentu kada loron ida hetan de’it $10, maibé iha situasaun normál loron ida bele hetan rendimentu boot liu $50 no kiik liu máka $25 kada loron.
“Husi rendimentu ne’e máka bele responde ba ha’u nia estudu, responde ba nesesidade loro-loron no nesesidade familia nian,” tenik nia.
Nune’e mós Januario esplika, dala ruma traballu fó husi dosente sira barak, maibé nia parte jere tempu ne’e ho di’ak nune’e labele abandona nia estudu inklui atividade negosiu nian.
“Sempre Jere tempu ho di’ak ba estudu ho negosiu, bazeia ba orariu ne’ebé iha, entaun tempu ne’ebé mak livre, uza hodi hala’o atividade negosiu, dala ruma susar tebes atu jere tempu ho di’ak, nesesidade obriga tenki faan sasan, tanba tempu ida agora buat hotu presiza osan,” nia infórma.
Enkuantu negosiante ambulante relata, difikuldade ne’ebé durante hasoru máka fatin laseguru no lapermanente ba nia tanba seguransa sira sempre duni no muda negosiante ambulante sira.
“Ha’u sujere ba governu liu-liu autoridade munisípiu Dili gestaun merkadoria sira, bele kria kondisaun merkadu ne’ebé mak di’ak, ba negosiante sira, tanba negosiante barak mak iha ona fatin, maibé sira nafatin okupa, tanba ami negosiante roda tolu sira, fatin ne’ebé mak seguransa sira fó, faan provijoriu de’it la permanente,” nia sujere.
Relasiona ho preokupasun ne’e lafaeknews tenta atu komfirma ho Koordenadór jestor Merkadu Taibesi, António Manuel Cardoso maibé okupadu ho asuntu seluk.
Estajiariu : Marcos Sarmento do Rego
Asisten Editór : Pedro de Almeida
