Lafaeknews-Governu liu husi Sekretáriu estadu Komunikasaun sosial(SEKomS), ofisialmente hala’o lansamentu ba radíu ba ema ho defisiénsia iha Timor-Leste ho frekuénsia 102.30 MHZ.
Tuir Reprezentante (SEKomS), Diretur, Direção Nacional Promoção e Desenvolvimento Media Local,(DNPDML), Jose Da Costa, Lansamentu ne’e signifika katak, radíu ba ema ho defisiénsia ejiste ona iha Timor-Leste maske área kobertura sei iha Dili mas ba oin sei mellora di’ak liutan
“Ohin ne’e ofisialmente ita halo lansamentu ba radíu ba ema ho defisiénsia ho frekuénsia 102.30 MHZ entaun ho lansamentu ne’e signifika katak radíu defisiénte ejiste ona iha Timor-Leste maske área kobertura sei iha Dili mas ba oin ita sei mellora, adapta exemplu hanesan rádíu komesa ita halo ne’e streaming,website ne’e ita planu ba oin,“dehan Diretur, (DNPDML), Jose Da Costa, ba jornalista sira hafoin lansamentu iha ba radíu komunidade ba defisiénsia iha fatin, AHISAUN, Fatuhada Dili, kuarta-feira(24/11/2021).
Nia hatutan, ba oin sei kontinua akompañia mellor di’ak liu tan ida-ne’e liu husi formasaun programa, tekníku atu uza ninia sustentabilidade ba oin ne’e tenke iha garante tanba ita investimentu ne’ebé polítika SEKomS, sei apoiu ba radíu ida-ne’e ba oin.
Enkuantu orsanmentu ne’ebé SEKomS apoiu ba radíu ba ema ho defisiénsia ne’e bazeia ba fundu transferénsia husi li’ur pedidu ne’ebé mai ho por volta rihun $3.000 resin
“Orsamentu para ba fundu ne’e ita bazeia ba fundu transferénsia entaun tinan ida- ne’e ita iha fim de ano entaun orsanmentu husi li’ur pedidu ne’ebé mai por volta dolar rihun tolu ($3.000) resin ida-ne’e ita kompras ekipamentu sira ida-ne’ebé ita diresaun rasik por exemplu hanesan iha transmite, antena, iha rasik ita mai instala iha ne’e, “nia explika.
Iha fatin hanesan Prezidente Radíu Komunikasaun Difisiénsia Timor-Leste (PRKTL), Gaspar Afonso, Hato’o agradese ba SEKomS ba lansamentu Radíu ba ema no defisiénsia.
“Agradese liu tan tanba governu liuliu sekretáriu estadu ba Komunikasaun sosial (SEKomS), sei hamutuk nafatin ho ita no halo lansamentu ba radíu ba ema ho difisiensia” Dehan PRKTL, Gaspar Afonso.
Nia rekomenda, Husu ita defisiénsia sira hotu luta ba buat di’ak defisiénsia sira seluk , hotu-hotu mantein nafatin pozisaun katak buat ne’ebé laloos dehan laloos, maibe presiza konsidera no valoriza dignidade ema ho defisiénsia iha rai ida-ne’e.
Jornalista : Crisencia Ferreira
Asisten Editór: Egidio Nono
