Lafaek News—Asessór Prinsipál Prezidénsia Repúblika, Tomás do Rosário Cabral akompañadu husi reprezentante Institutu Jestaun Ekipamentu Institutu Públiku-IJE. IP observa mota iha postu Administrativu Laclo, Munisípiu Manatutu, hodi normalizasaun Korrente mota Laclo estraga natar no to’os komunidade nian iha loron 4 fulan Abril tinan 2021 prejudika produsaun husi agrikultor sira durante tinan rua nia laran.
“Hanesan enkontru semana rua liu ba katak, ekipa IJE mai ona halo “site visit”, ohin ita mai hamutuk ho ekipa IJE nian hodi haree atu bele ajuda normaliza fila fali, atu nune’e bee irigasaun bele la’o di’ak, komunidade sira bele halo fila fali natar komunidade sira nafatin iha ai-han,” hateten Xefe Ekipa Prezidénsia Repúblika, Júlio Gonçalves Sesta( 09/12/2022).
Xefe Ekipa Prezidénsia Repúblika, Júlio Gonçalves hateten, ekipa husi PR hamutuk ho IJE mak observa mota rua ne’e, tuir orientasaun tanba Xefe Estadu, Ramos-Horta.
Enkuantu tuir komunikadu média Palasíu Presidensiál ne’ebé mak Lafaek News asesu dehan, Segunda-feira foin lalais ne’e, Prezidente Repúblika, José Ramos-Horta, bolu ona Ministru Obras Públika, Abel Pires ho Prezidente IJE.I.P hodi halo normalizasaun ba mota Laclo no ida seluk iha aldeia Ilihuli suku Iliheu ne’ebé estraga hotu komunidade nia to’os no natar.
Fatin hanesan Reprezentante IJE, Egas Correia Lemos, hateten, entidade ne’e seidauk bele normaliza, tanba hetan pedidu humanitáriu barak, maske ajenda ona, normalizasaun ba mota rua refere, hasoru difikuldade tanba la iha Estrada atu destaka ekipamentu pezadu no entidade ne’e buka hela meius atu rezolve, tanba udan mos besik ona.
“Mákina balun lori ona mai estasiona iha ne’e, atu hahú servisu, bainhira sira hahú servisu iha difikuldade oituan kona-ba ema nia natar ema la fó dalan, tanba dalan ne’e bá ami importante, haree iha mota Laclo sé ami lori kombustível ne’e susar boot ba ami. Maibé “não quer dizer” ami la halo la’e, ami prontu atu halo,” dehan Egas.
Entretantu Xefe Suku Laicore Postu Administrativu Laclo Munisípiu Manatutu, Zeltino Tino do Rosário Cárcerres, husu Prezidente Repúblika, José Ramos-Horta atu reforsa no mantein komunikasaun ho IJE, nune’e normaliza mota refere.
“Husu bá Prezidente-da-Repúblika bele reforsa nafatin bá IJE para normaliza mota ne’ebé sobu komunidade sira-nia natar, tanba durante tinan rua ona sira la halai natar no menus ai-han,” Xefe Suku Zeltino.
Autoridade lokál hato’o ona pedidu bá Administradór Munisípiu hodi husu IJE atu halo intervensaun hodi labele estraga irigasaun ne’ebé kanaliza bee bá komunidade sira-nia natar, maibé eskavadór rua de’it ida avaria la konsege normaliza ikus mai bee sobu sira-nia natar kuaze ektares 150.
Tuir dadus ne’ebé iha, natar ne’ebé hetan estragus husi kalamidade públika 4 Abríl 2021 hamutuk ektáres 9000, natar ne’ebé bee sobu husi suku 4 iha Postu Administrativu Laclo hamutuk natar hectare 3.500, kompostu suku Iliheu bairo Rembor hectares 1.500 no postu administrativu Manatutu Villa ho Obratu hamutuk hekares 4000, nune’e to’o agora natar hirak ne’e kontinua abandona husi agrikultor sira,tanba governu liu husi IJE seidauk normaliza mota refere.
Jornalista : Rita Moniz
Editór : Agapito de Deus
