Venilale (Lafaek News)—Eskola Ensinu Baziku Filial (EBF) Osso-Gori, suku Uatu-Haco, postu administrativu Venilale, munisípiu Baukau hamosu multi klase (kahur malu) kompostu husi primeiru anu too sestu anu, tanba menus professor hodi hanorin estudante hamutuk ema na’in 66.
“Professores iha ne’e ami nain tolu de’it, ami iha klasse kompletu, maske iha area remotas maibé diferensa klases husi primeiru anu ate sestu anu, ne’e katak primeiru anu tenke iha mestri ida to’o sestu anu, maibé menus ba professores entaun ami tau ba multiklasse peimeru anu ho segundu anu hamutuk, tresiru anu ho kuartu anu to’o kintu no sestu anu hamutuk iha klasse ida,” dehan Kooredenador Eskola EBF Osso-Gori, Paulo Antonio Varela, ba lafaek news iha nia kna’ar fatin fóin lalais ne’e.
Koordenadór EBF Osso-Gori ne’e informa professores ne’ebé da-daun hanorin estudante iha eskola refere hamutuk ema na’in 3 permanente nune’e aloka tempu hamutuk oras 5 ba klase ida oras 2, tuir kuríkulu hodi fasilita estudante sira, maske estudante sira kahur malu maibé tur tuir ida-idak nia klasse iha turma ida, nune’e professores bele hanorin no fó mós traballu ba estudante sira.
“Ami fó lisaun ba klasse ida seluk, klase ida fó traballu ba sira kuandu to’o oras intervalu fó fali traballu ba klase ida, hanorin fali klasse ida seluk loron-loron ami fahe tempu hanesan ne’e, maibé prosesu aprendisajen la’o normal tuir orariu ne’ebé estabelese iha kurikulum nia laran ne’e ami hala’o diariamente iha ami nia eskola,” Nia esplika.
Alende ne’e mós nia relata, turma hamutuk 6 eskritoriu professores ida, no professores nain 3, estudante total 66, no livrus ne’ebé atu fasilita professores hodi hanorin sufisiente, maibé professores nain tolu de’it defisil tebes, ema balun ne’ebé maka laran luak atu mai hanorin estudantes sira ne’e di’ak liután.
“Professores balun maka mai atu hanorin ami agradese,” nia subliña.
Problema seluk ne’ebé EBF Osso- Gori hasoru mak laiha bee moos, estudante sira tenke lalin bee ho distánsia dook hodi lori ba eskola uza ba fase liman no tein ba estudante sira merenda.
“Bee moos iha maibé tempu bai-loron bee laiha, entaun atu uza ba sanitariu maibé falta maka bee, tanba ne’e, ami haruka labarik sira ba kuru bee, entaun ida ne’e prejudika estudantes sira nia prosesu aprendisajen,”dehan Paulo Antonio Varela.
Durante iha estadu emerjénsia ema hotu-hotu kumpri medidas prevensaun liu husi fase liman loron-loron maibé eskola ne’e rasik bee laiha, tanba ne’e obriga estudante kuru, maibé prejudika tebes estudante sira nia estudu, sanitáriu mós presija bee, maibé bee laiha rua aat inklui nia odamatan mós ladi’ak.
“Sanitariu iha haat balun di’ak no balun aat ona, hanesan tanke bee no odamatan haris fatin nian inklui posu aat ona ami taka ho kalen de’it, problema liu maka bee, tanba ne’e labarik sira ba kuru fali iha fatin seluk maka ense tanke haris fatin no mós uza hodi fase liman,” Tenik nia.
Entretantu, ho problema ne’e koordenador eskola EBF Osso-Gori rekomenda ba parte kompetente atu hare’e ba edukasaun nian ou bele instala bee no hadiah sanitariu nune’e estudante no professores bele utiliza hodi hala’o atividade estudu ho di’ak.
Jornalista : Pedro de Almeida
Editora : Nelya Barros
