Lafaek News-Ministru Transportes no Komunikasaun (MTK), José Agustinho da Silva hato’o ba Primeiru Ministru (PR) Taur Matan Ruak kona-bá planu konstrusaun terminál rua hanesan Tibar ho Hera.
Ho planu terminal rejionál sira ne’ebé halo atendementu ba populasaun parte Leste hanesan Bekora sei muda sai ba hera, no terminal rejionál parte Oeste hanesan Tasi-tolu sei muda ba Tibar, atu nune’e bele loke tan espasu sidade Díli.
“Tasi-tolu hanesan fatin istóriku ida no situs nasaun ninian, ita tenke konserva no perzerva fatin ne’e, tanba iha eventu estadu nian ne’ebé akontese ita presiza realiza iha Tasi-tolu, nune’e ho razoens sira ne’e ita tenke muda terminal sira ne’e, hodi loke tan espasu ba kapitál Dili,” dehan José Agustinho ba Jornalista sira hafoin ekontru ho PM Taur Matan Ruak, Tersa (10/11/2020) iha palásiu governu, Díli.
Nia haktuir, muda sai terminal rejionál sira ne’e hodi hasa’e transporte públiku hanesan mikrolet no taxi atu hala’o sira nia movimentu to’o iha ne’ebá, nune’e hasa’e tan sira nia rendimentu.
Nune’e, liga ho Diresaun Nasionál Transportes Terrestre (DNTT) ne’e, iha planu Ministériu nian oinsa mak regulariza movimentu kontentores sira ne’ebé halo movimentu iha loron inplika ba engrafamentu no akontese asidente tráfiku.
“Ita autoriza sira katak loron imi labele halo operasau, maibé imi la’o iha kalan, maibé tenke hatur ho despaxu ida, no despaxu ida ne’e MTK hato’o ona draf esbosu despaxu ne’e ba, Ministériu Interior, MTCI no Ministériu Finansas atu bele fó despaxu,” Nia hakotu.
Jornalista : Juvita dos Santos
Editór : Floriano Soares
