Lafaek News-(Ermera)—Eskola Báziku Filial (EBF) 30 de Agosto Talimoro, postu administrativu Ermera villa, munisípiu Ermera, durante tinan 24 kontinua halerik ba fasilidade eskola.
“Eskola ne’e desde populasaun indonezia ate agora fasilidade eskola nian menus liu, hanesan sala de aula, iha ne’e sala lima de’it estudante husi primeiru anu to’o sestu ano, ida ne’e mak ami prefere hela atu estadu bele tau matan aumenta sala da atu nune’e ami bele atende estudante sira iha prosesu aprendizajen bele la’o loos,” Preokupasaun ne’e hato’o Husi vise koordenador EBF Talimoro Francisco Xavier ba Lafaek News iha kna’ar fatin EBF Talimoro, Segundu semana ne’e.
vise koordenador EBF Talimoro ne’e preokupa mòs kona-ba fatin tein ba estudante sira merenda, tanba ba da-daun utiliza hela hela sede suku tuan hodi tein ba estudante sira han.
“Preukupa hela mòs armajen atu rai hahán nian sei falta, hanesan mòs biblióteka mòs laiha no mòs fatin ne’ebè labarik sira atu halo desportu mòs iha ne’e ami araska liu, ami sujere ba Estadu atu buka meius oinsá atu nune’e bele tau atensaun ba parte sira ne’ebè ami ami sita ona,” nia rekomenda.
Nia dehan, esforsu ne’ebè atu solusiona ba problema sira mak iha tinan kotuk professor sira enkontru ho konsellus dos pais, halo ona relatóriu ba edukasaun nasionál, maibè to’o agora laiha rezultadu, tanba eskola refere iha sala permanente hamutuk 3 temporária 2, professor permanente na’in 3, Kontratadu nain 6, voluntáriu na’in 5, total professor hamutuk (14).
Eskola Báziku Filial ne’e mòs akumula estudante hamutuk atus ida walu-nulu resin haat (184), mane sanulu- resin hitu (17), feto walu-nulu resin hitu (87).
Entretantu observasaun lafaek news iha terenu nota infraestrutura eskola ne’e ho kondisaun grave tanba harii dezde okupsaun Indonezia, kalen fruzen hotu ona, ai mòs lahuk, moru didin lolon rahun, janela ona ho tripleks dodok hotu afeta estudante sira laiha konsentrasaun ba material ne’ebé professór sira hanorin.
Jornalista : João da Costa Soares
Editora : Nelya Barros
