Lafaek News—Domingos Soares ho idade 67 enfrenta moras struk durante fulan hitu (7) iha de’it uma laran uza ai-tonka no ema kaer máka bele la’o, presiza tebes kadeia roda ida atu bele hakmaan no bele book an netik.
Domingos Soares hela iha aldeia Loron-Matan, Suku Madahoi, Postu-Administrativu Don-Aleixo, munisípiu Dili, durante ne’e la konsege halo tratamentu iha ospitál, tanba situasaun pandemia Covid-19, konsumu de’it ai-moruk tradisionál.
Moras ne’e kona ha’u iha 12 Abril 2021 to’o agora la’o ladiak, atu ba halo tratamentu iha ospital, maibé iha situsaun Covi-19 entaun lakonsege ba, uza de’it ai-moruk tradisional maibé to’o agora laiha mudansa nafatin,” dehan Domingos Soares ba jornalista lafaek news iha nia rezidensia aldeia loron matan, foin lalais ne’e.
Domingos hatete, durante ne’e toba de’it iha kama laran, atu hader no ba soe foer ki’ik no boot tenke ajuda husi familia sira, atu halo kamaan nia hamrik máka ai-tonka.
Ai-tonka ne’e ha’u nia oan máka sosa rua hamutuk $40.00, uza de’it ida ne’e, ai-tonka laiha halo terus liu familia sira tanba ne’e ha’u husu ba governu no ema laran diak sira se bele ajuda netik ha’u ba, ha’u la husu buat barak maibé presija de’it kadeira roda,” tenik Avo Domingos.
Iha sorin seluk nia feen kaben Domingas Perreira Brantis idade 56, haktuir, uluk kondisaun sei normal hela halo serbisu baku bee, máka suporta nesesidade uma laran agora moras tiha ema nu’udar feen pasensia tenke haree nia iha uma.
Ha’u nu’udar feen kaben loro-loron iha uma de’it hare’e nia (Domingos Soares), fó han fó hemu ba so’e foer ki’ik boot tenke kaer, tanba nia isin sorin lamoris (maten) uza ai-tonka mós tenke kaer máka bele, la kaer susar los,” hateten feen kaben.
Domingas dehan tan, oan sira hanoin atu sosa kadeira roda maibé osan lato’o entaun sosa de’it ai-tonka ba nia, nune’e sira husu tulun ba ukun na’in sira apoiu netik kadeira roda.
Ami presiza liu máka kadeira roda,” tenik nia feen kaben.
Enkuantu Xefe aldeia loron matan Patrisio da Silva, fundamenta, durante akompania kondisaun Domingos Soares nian iha situasaun ne’ebe defisil nia laran tanba hetan moras struk ne’e la’o mós susar tebes.
Katuas Domingos Soares, defisensia buat ne’ebe prinsipal liu ba nia máka kadeira roda, tanba ne’e ha’u husu ba governu atu apoiu netik kursi roda ida, se governu hanoin nia povu apoiu mós alimentasaun ba uma kain Domingos Soares nian, nune’e bele konsumu loron-loron, ” imforma xefe aldeia loron matan.
Atu remata entrevista ida ne’e xefe aldeia Loron-Matan husu ba jornalista lafaek news tenke fó sai atu nune’e governu bele asesu povu nia halerik no preokupasaun.
Entretantu, iha aldeia loron matan defisensia na’in tolu, Domingos Soares presija kursi roda, ida seluk hetan ona kursi roda no ida kondisaun atu rekupera ona, faluk na’in 14, kbi’it laek 8, komunidade hela iha uma baraka 2, idozu ne’ebe seidauk hetan subsídiu 1 no labarik abandonadu 10.
Jornalista : Pedro de Almeida
Editor : Agapito de Deus
