Lafaek News—Sekretáriu Estadu Protesaun Sivil liu husi Diresaun Nasionál Prevensaun Konflitu Komunitaria (DNPKK), halo edukasaun sivika ba estudante Fakuldade Engenaria Universidade da Paz (UNPAZ) atu hasa’e konsiensia iha prevensaun konflitu hodi kontribui pas, estabilidade no dezenvolvimentu nasional.
Tuir Diretor Nasional Prevensaun Konflitu Komunitaria (DNPKK), Antonio Ximenes, esplika, implementasaun programa edukasaun sivika ho tema, ‘Prevensaun no rezolusaun konflitu,’ ne’e liga ba univesidade UNPAZ atu partilla informasaun ba estudante no dosente sira atu bele prevene konflitu iha aredores universidade no iha komunidade nia leet, tanba estudante sira mak ajente dezemvolvimentu ba futuru.
“Ami tau planu ba Universidade UNPAZ atu bele hahú aktividade prevensaun, liu-liu ba prevensaun konflitus ba komunitáriu, tanba ne’e husu ita boot sira hasees aan husi konflitu rasik iha kampus no iha fatin ne’ebé de’it,” dehan Diretor DNPKK Antonio Ximenes, liu husi nia diskursu iha salaun Saúde Públika UNPAZ, segunda (18/10/2021).
Iha sorin seluk dekanu Fakuldade Engenaria, José Manuel Maniquin, kontenti ho programa DNPKK tanba bele mai halo sosializasaun prevensaun konflitu iha Universidade da Paz hodi fahe informasaun ba estudante no dosente sira.
“Ha’u hanoin programa sira hanesan ne’e di’ak teb-tebes tanba bele mai ami ne’ebé hakna’ar a’an iha akademiku, liu-liu ba ami hanesan dosentes no mós estudantes, bainhira ekipa husi Ministério Interior hato’o pedidu ida ne’e, hanesan dekanu fakuldade ingenaria ha’u kontenti teb-tebes,” hateten José Manuel Maniquin.
Dekanu hatutan, liu husi atividade ida ne’e bele partilla mos informasaun ligadu ho programa governu nian ne’ebe kada ministériu iha, nune’e parte akademiku bele hatene no tetu ho kondisoens ka programa ne’ebe traxa ona iha asaun annual.
Entretantu iha observasaun jornalista lafaeknews iha terenu nota partisipasaun iha atividade refere maka ekipa husi Diresaun Nasional Prevensaun Konflitu Komunitaria (DNPKK), Dekanu Fakuldade Engenaria, dosente sira inklui estudante enginaria hamutuk nenulu (60).
Estajiada : Carla Borges
Asisten Editor : Pedro de Almeida
