Lafaek News—Ministru Edukasaun Juventude no Desportu (MEJD), Armindo Maia, distribuisaun maskara prioriadaden eskola iha fronteira.
“Maskara ita halo tiha planu atu distribui, primeiru fó prioridade ba eskola sira iha fronteira, liu-liu munisípiu rua ka tolu iha fronteira ne’ebé ita tenke distribui,” dehan MEJD Armindo Maia ba jornalista sira iha palsio governu, hafoin partisipa iha reuniaun konsellu ministru, kuarta, 13/01.
Ministru ne’e dehan maskara ladun barak, maibé iha stock hamutuk rihun 660 ne’ebé atu distribui, tanba eskola mós tuir kalendariu eskolar atu hahú iha dia 18 fulan janeiru.
“Ita hanoin katak tempu sei iha atu distribui, maskra la’os buat foun tanba uluk estadu emerjensia liu ba mós ema distribui ona, ne’ebé labele hein deit buat hotu husi estadu, maskra ne’e dolar ida, liu-liu hena ne’ebé sei bele fase hodi usa durante iha estadu emerjensia, tanba tuir kalendariu eskola ne’e hahu iha dia 18 ba eskola hotu-hotu, maibe ita mós presija hare’e ba iha preparasaun eskola nian,” nia informa.
Armindo Maia dehan, nia parte halo ona reuniaun ona ho parseiru atu ministériu bele iha ona hanoin, tanba hare’e ba orsamenetu da-daun aprova seidauk ezekuta, maibé material balun ne’ebé maka iha bele distribui ona hanesan maskara, hand-sanitizer, desinfetante no fornesementu bee ba eskola sira.
Enkuantu antes ne’e mós bankada husi partidu Libertasaun Popular (PLP) Abel Pires, husi nia deklarasaun iha uma fukun parlamentu nasionál hatete, bainhira atu loke eskola kontinua tau prioridade ba material no fornesimentu bee ba eskola sira.
“Desizaun atu loke eskola, ha’u konkorda, maibé oinsa uza oportunidade atu hadia infra-estrutura bazikas iha eskola hotu-hotu no mós iha universidade, tempu oportunu ba governu atu hadia liu-liu fornesimentu bee mós ba eskola sira, se sem bee mós susar teb-tebes ita atu loke eskola kontinua, entaun medidas preventiva inportante liu maka uza bee fase liman,” nia sujere.
Jornalista : Pedro de Almeida
Editora : Nelya Barros
