Lautém-(Lafaek News)—Ikan lanu mate labarik ida (Leonel) ho idade 9, inklui katuas ho ferik ida kondisaun moras todan no evakua kedan ba ospitál Baukau hodi submete ba tratamentu.
Akontesimentu ne’e iha tersa (12/01/21) iha suku Parlamentu postu administrativu Lautém, munisípiu Lautém, hafoin peskadór na’in rua kaer ikan rua iha area tasi tenu iha tuku 1: 00, lokaraik hodi lori ba uma, bainhira too uma sira na’in rua fahe ikan rua ne’e ema ida hetan ida, nune’e ikan rua ne’e ida-idak lori ba uma hodi da’an no sona maran ba modo kalan, bainhira tasak suru tau meza han rame-rame lanu kedan labarik mane ho idade tinan 9 mate kedan no katuas ho ferik bulelu kedan iha fatin.
Tuir komandante polísia Munisípiu Lautém superintendente Polísia, António Rego Fernandes ba jornalista sira kuarta (13/01/21), katak ikan lanu mate Leonel Fernandes tinan 9, eskola ona too iha kantu anu no nain rua ne’ebé kondisaun grave no transfere ona ba ospital federal Baukau.
“Kronolojia akontesementu peskadór nain rua iha tuku ida lokraik dia 12 ba halo peskas iha tasi tenu nian konsege kaer ikan rua, maibé ikan rua ne’e la hanesan ho ikan baibain ita konsumu ne’e sira nain rua fila mai uma fahe ikan 2 ho medida 60 centi meter no fahe ikan ne’e ba malu, ikan rua ne’e ida nian da’an liu halo agusal no ida nian sona maran husi ikan ida sona ne’e mak lanu labarik Leonel Fernandes la konsege sala nia vida, ami mak membru sira konsege identifika iha ema nain 7 mak ikan lanu na’in 3 ladún grave no kondisaun di’ak no fila fali ba uma nain rua grave no transfere kedas horkalan ba iha hospital federal Baukau no na’in ida mate ne’e konsege lori mai sentru saúde internamentu Lautém maibé la konsege sava vida,” katak komandante PNTL munisípiu Lautém ne’e.
Sorin seluk doutora Sabina Noejia da Glória, ne’ebé mak halo atendimentu ba pasiente na’in rua ne’ebé sofre husi ikan hateten, tersa kalan ne’e iha pasiente nain rua ne’ebé grave mak iha sentru internamentu Lospalos, maibé pasiente na’in rua ne’e grave tebes.
“Ha’u foti desizaun hodi transfere sira ba hospital federal Baucau hodi halo atendimentu,sira nain rua sai husi hospital internamentu Lospalos iha tuku 12 ne’e , pasiente nain rua ne’e ho iha sentru internamentu Lospalos kontinua muta no intoksitasan ho ikan duni halo sira kontinua muta nafatin tanba ne’e transfere kedas ba Baukau,” katak doutora ne’e.
Entertantu’ komesa loron 12 tersa horseik servisu saúde Munisípiu Lautém hamutuk ho médiku sira servisu makas hodi halo transfere pasiente afetadu ikan husi sira nia hela fatin ba ospital no sentru internamentu sira, mate isin Leonel Fernandes familia lakohi halo autopsia, agora iha ona uma familia nian hodi halo tuir kultura suku Parlamentu nian.
Jornalista : Elidio Castro
Editora : Nelya Barros
