Lafaek News—Ministériu Saúde (MS) deteta tan kazu pozitivu Covid-19 foun na’in 6 iha munisípiu Dili, iha ne’ebé nain 2 husi postu administrativu Fatumea, munisipiu Kovalima rekupera.
“Husi horiseik mai ohin, husi amostra ne’ebé rekolla iha munisípiu Dili, durante atividade buka tuir kontaktu besik, iha ta kazu positivu nain 6,” dehan kordenador forsa tarefas ba prevensaun no mitigasaun surtu Covid-19, Rui Maria de Araújo liu husi konferensia imprensa iha sala situasaun SIJK, CCD, Sabadu (13/03/2021).
Koordenadór ne’e esplika, husi pozitivu ne’e rua (2) husi aldeia Loron-Matan, suku Madohi, pozitivu hirak ne’e kontaktu besik ho sira nia familia uma-laran.
Kazu pozitivu 2, profisionál saúde ne’ebé halo formasaun Emergency Obsterics and Neonatal Care (EMONC) iha HNGV, sira nain rua kontaktu besik ho profisionál saúde ida ne’ebé mós halo formasaun hanesan iha HNGV, ne’ebé anunsía pozitivu iha dia 10 de Marsu 2021, hamutuk hotu sira nain 7 ne’ebé tuir formasaun EMONC no detetadu nu’udar kazu pozitivu, no mós kazu pozitivu 1, rezultadu husi rastreiu aleatóriu iha aldeia Terra Santa, suku Madohi, postu-administrartivu Dom-Aleixo.
Alende ne’e mós kazu 1, idade tinan 1 fulan 8, deteta iha fatin izolamentu ne’ebe ba izolamentu hamutuk ho nia inan, ne’ebé atravesa irregularmente fronteira.
“Ho nune’e, kazu detetadu ka pozitivu iha Dili husi dia 7 de Marsu to’o ohin 13, hamutuk hotu 53, ne’e fahe ba cluster 14, namkari iha instituisaun 3, eventu 1 no suku 6 iha postu-administrativu Dom-Aleixo, nomos postu-administrativu Vera Cruz,” tuir nia.
Jornalista : Sandi Belo
Asisten Editór : Pedro de Almeida
