Lafaek News—Negosiante Komoro, Francisca Mendonça husu Polísia Nasionál Timor Leste (PNTL) labele bandu negosiante sira ne’ebé fa’an modo iha situasaun ohin loron, tanba atu responde nesesidade iha periódu lockdown iha munisípiu Dili.
“Polisia sira ami dehan ami lori modo ba fa’an iha uma iha uma ema la sosa, modo ne’e ami ba sosa iha Taibesi fan tutan, ami osan laiha, se ami la fan ami atu sosa hahan husi ne’ebé?,” negosiante Fransisca Mendonça ba lafaek news iha Komoro suku Madonhi, sábadu semana ne’e.
Francisca argumenta katak, aihan ne’ebé simu husi programa cesta bázika nian ba da-daun laiha tiha ona, tanba iha uma laran ema hamutuk ualu (8) kedan
“Ami hahan foin lalais simu sei iha oituan maibe ida deit la to tanba oan hamutuk nain ualu loron haan ne’e la oras han tanba ita iha uma de’it hamlaha sedu, nune’e ami nia hahan sesta bázika hotu ona,” Francisca reafirma.
Tanba ne’e, nia sujere ba autoridade seguransa iha munisípiu Dili, labele bandu sira nia atividade negósiu iha estrada ninin, tanba liu husi negósiu mak bele hetan netik osaan dolar id aka rua hodi sustenta moris.
“Etaun ami tenke mai fa’an para hetan satu dolar ka dua dolar loron ida, maibe agora polísia haruka ami la fa’an ami atu han saida?,” negosiante ne’e preukupa.
Jornalista : Acacio Pinto
Editora : Nelya Barros
