Lafaek News—Koordenador Forsa-Tarefa ba Prevensaun no Mitigasaun Surtu Covid-19, liu husi kompriensa Imprensa iha Sentru Integradau Jestaun Kriji (SIJK), Rui Maria Araújo, informa, Timor-Leste rejista tan kazu komfirmadu positivu Covid-19 foun nain 2 husi fatumea, nain 6 rekuperadu atual baixa nain 21.
“Kazu konfirmadu foun 2, nafatin husi Aldeia Klauhalek, Suku Belulik Leten, Postu Administrativu Fatumean, Munisipiu Kovalima, Sira nian 2 membru familia husi kazu foun ne’ebé anunsia tiha ona horiseik, Ekipa ambulánsia to’o iha Fatumea, no evakua kazu konfirmadu foun hamutuk nain 6, mai izola iha Vera Cruz, husi nain 6, balun asintomátiku, balun iha sintoma infesaun respiratóriu agudu, maibé sira hotu iha kondisaun estável, orsida kalan sira too iha Vera Cruz,” Esplika Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria Araújo, iha konferensia imprensa, CCD, Kuarta (24/02/2021).
Koordenador esplika, ekipa vijilánsia epidemiolójika ho ekipa laboratóriu, ohin hamutuk ho ekipa Sentru Saúde Fatumea, nafatin hala’o rastreiu ka foti amostra husi ema ne’ebé iha kontaktu besik ho sira ne’ebé konfirmadu pozitivu ona, no mós husi viziñu sira.
“Kazu sira konfirmadu foun husi horiseik to’o ohin iha Fatumea, nafatin hatudu katak iha ona transmisaun lokal husi possivelmente kazu importadu klandestinamente husi populasaun ne’ebé tama sai fronteira, maibé sei restritu iha cluster ka agrupamentu ida, iha suku Belulik leten,” tenik nia.
Rui hatete, diferensa entre transmisaun lokal ho transmisaun komunitária, transmisaun lokal signifika iha kazu importadu ruma ne’ebé hadaet ona moras ne’e, ba ema ne’ebé hela iha rai-laran, no la halo viajen, transmisaun komunitária signifika, ema ne’ebé pozitivu, la iha istória viajen, no la iha istória kontaktu ho ema ruma ne’ebé halo viajen.
Nia fundamenta, hakarak mós fó hanoin fali katak hare’e husi nivel alerta no resposta ne’ebé Governu Timor-Leste adopta ba prevensaun no mitigasaun Covid-19 iha Timor-Leste, hahú 23 de Fevereiru 2021, Timor-Leste tama fali ba faze neebé hanaran ALERTA 3, ka faze mitigasaun.
“ALERTA 3 ne’e aplika ba Timor-Leste tomak, maibé Serka Sanitária aplika de’it ba munisípiu Kovalima no Bobonaru, tuir rezolusaun governu nº4 & nº5, 15 Fevereiru 2021. Ema ka sasan atu tama sai ba munisípiu rua ne’e, tenki iha autorizasaun husi Sala Situasaun, sentro Integradu jestaun de krises,”nia hatutan
Nune’e mós kona-ba prosesu rastreiu ka screening ne’ebé halo iha Munisipiu Kovalima, Bobonaro ho RAEOA, sei nafatin la’o, rezultadu la iha mudansa barak husi informasaun ne’ebé hato’o ona horiseik, tanba ne’e apela ba populasaun iha Fatumea atu labele pániku, tuur hakmatek iha ida-idak nia fatin, lalika la’o ba mai lai, fó tempu atu ekipa saúde ho ekipakonjunta husi sala situasaun, buka tuir kontaktu, no foti tan amostra hodi bele halo teste.
Entretantu dadus Covid-19 ba loron 24 fevereiro 2021, kazu konfirmadu foun 2, kazu rekuperadu 6, kazu ativu 21, total ema iha kuarentena sa’e ba 289 (horiseik 190). Ema tama ohin husi Aeroportu Internationál Nicolau Lobato hamutuk 54, no nain 15 fila husi Bayu Undang, 39 fila husi Austrália.
Jornalista : Sandi Belo
Asisten Editor : Pedro de Almeida
