Lafaek News–Reuniaun konsellu ministru ne’ebé lidera husi Vise Primeira Ministra no Ministra Solidariedade Sosial no Inklusaun (MSSI), Armanda Berta dos Santos, apresia proposta reforma programa bolsa da mãe husi projetu pilotu ba jerasaun foun.
Ministru Presidensia Konsellu Ministru (MPKM) Fidelis Leite Magalhães, informa, proposta ba reforma programa Bolsa da Mãe liu husi projetu-pilotu “Preparasaun ba Jerasaun Foun” ne’e aprezenta husi Vise Primeira-Ministra no Ministra Solidariedade Sosiál no Inkluzaun, Armanda Berta dos Santos no Vise-Ministra Solidariedade Sosiál, Signi Chandrawati Verdial.
“Reforma ne’e, prevee ona iha Planu Rekuperasaun Ekonómika, hahú ho implementasaun faze-pilotu ida, ho durasaun tinan tolu, ho foku iha infánsia dahuluk no ho objetivu hodi hamenus ki’ak, má-nutrisaun no mortalidade infantíl,” MPKM, Fidelis Leite Magalhães, ba jornalista sira iha palasio governu, kuarta, (24/02/2021).
Governante ne’e fundamenta, programa ida ne’e foin to’o iha fase apresentasaun opsaun politika lejislativa, iha tempu oin mai husi parte MSSI sei hato’o fali mai presidensia konsellu ministrus kona-ba dalan normativu saida maka sira sei opta.
“Se nesesariu atu altera dekretu lei, sira hato’o fali mai ita halo avaliasaun no halo analiza didi’ak depois lori fali ba iha diskusaun ba aprovasaun iha konsellu misnistrus, mas inisiativa ohin hetan apresiasaun pozitiva husi membros konsellu ministrus,” tenik Fidelis.
Entretantu, parte téknika nian maka presiza finaliza proposta refere no atu aserta didiak konaba rekjitus legais sira ne’ebé maka tenke kumpri hodi nune’e bele implementa inisiativa alterasaun ba programa bolsa da mãe nian.
Jornalista : Pedro de Almeida
Editora : Nelya Barros
