Lafaek News—Ministériu Turizmu Komérsiu no Indústria (MTKI), José Lucas do Carmo da Silva, hetan apresiasaun husi reuniaun Konsellu Ministru (KM), kuarta (24/02/21), bainhira aprezenta proposta krisaun komisaun koordenasaun ba implementasaun parké industrial.
Ministru Prezidénsia no Konsellu Ministrus (MPKM), Fidelis Manuel Leite Magalhães, hateten, komisaun Koordenasaun ba implementasaun Parké Industriál ne’e importante tanba atu asegura implementasaun no kondisaun husi parte ezekutivu nian ba programa hari’i Parké industrial ne’ebé ho objetivu atu hamorin liután investimentu sira iha rai laran.
“Parké Industriál ne’e ho naran seluk ita bele hanaran zona industrial,” informa MPKM Fidelis Magalhães ba jornalista sira hafoin remata reunian Konsellu Ministrus iha Palasiu Governu Dili, Kuarta (24/02/2021).
Governante ne’e, iha reunion konsellu ministru ba loron ohin apresia tebes aprezentasaun programa ne’e husi MTKI, ho ida ne’e membrus KM tomak iha vontade ne’ebé boot atu kolabora ho Ministru Turizmu Komérsiu no Industria (MTKI), hodi avansa ho lalais programa ne’e.
“Konsellu ministru ohin deside katak matéria ba proposta ida ne’e natoon de’it atu hatuur tuir despaxu nian e la presiza atu halo tuir rezolusaun ida konsellu ministru nian,” Fidelis dehan.
Maibé, Konsellu Ministru (KM) apresia proposta refere apoiu inisiativa atu hari’i Parké Industrial ne’ebé lidera husi Ministru Turizmu Komérsiu no Indústria no sei hato’o ba Primeiru Ministru atu halo despaxu ida hodi hari’i no formaliza komisaun koordensaun téknika ida.
Jornalista : Juvita dos Santos
Editora : Nelya Barros
