Lafaek news—Akontesimentu inséndia loron 19/11/2024, iha dader haleu tuku 8 liu minutu 30, derepente ahi suar husi hela fatin negosiante sira merkadu Taibessi, sasin sira deskonfia sunu lilin mak mohu hodi han tutan ba ropa obralan.
Iha akontesimentu ne’e, ahi konsege haan motorizadas 2 inklui sasan uma laran la konsege salva tanba ekipa bombeiru la konsege salva.
Lidia Guterres nudar vítima husi inséndiu refere nia haktuir, ahi lakan husi nia viziñu nia uma, tanba uma nain sunu tiha lilin la húu mate, maibé uma nain husik lakan hela no ba tiha kampus, molok viziñu sira hakfodak ahi suar sa’e ona ba loron leten ona, husik sasan hotu ahi han, konsege salva de’it kosok-oan ho estatua inan Maria Virgen.
“Ha’u tama ba uma laran haree ba uma sorin ahi naroman sa’e tiha ona, kala sira sunu hela lilin, sira la hamate, sira ba tiha kampus, ahi Han sae husi sira ninian, Ha’u atu ba foti sasan mos labele, tanba didin Ida de’it, depois Ha’u mos kous hela Bebe no Ha’u halai sai mai fo tiha Bebe ba feto maluk viziñu hodi ha’u tama ba foti maromak ne’ebé Mak proteje Ha’u hodi halai sai,” Lidia Guterres ba Lafaek News iha fatin akontesimentu merkadu Taibessi, tersa (19/11/2024).
Vítima husi inséndiu ne’e haktuir, iha akontesimentu ne’e nia konsege salva de’it Bebe ho estatua, maibé osan ne’ebé rai hamutuk iha kofre rua ho sasan uma laran inklui dokumentus la salva total.
Ligadu ho akontesimentu Prezidente Autoridade Munisipiu Dili (PAMD), administradór Gregorio Saldanha, too iha kedan iha fatin akontesimentu hodi observa motivu husi inséndiu refere, Prezidente Autoridade Dili ne’e mos husu komunidade sira atu labele hela iha merkadu, tanba merkadu fatin ba negósiu nian, maibé la’os atu hela permanente.
“Atividades públiku hanesan merkadoria faan sasan sira pois labele mai hela, pois uza tan sasan sira ne’ebé estdu bandu, polísia bandu no ahi han prezudika ema barak sai vítima uma estragus no sasan uma laran osan no dokumentus, sorte ema la kanek no la mate,” PAMD ne’e akresenta.
Ikus liu Prezidente Autoridade Munisípiu Dili ne’e hatuir, fatin ne’ebé da-daun ahi-han estadu tau ona atensaun ba fatin ne’e no iha ona planu, maibé akontesimentu ne’e halai uluk tiha, iha akontesimentu ekipa bombeiros ho autoridade protesaun sivil no PNTL inklui mos ekipa jestun merkadu too kedas iha fatin hodi hamate ahi.
Jornalista : Felix Fernandes/Elviano F. Belo
Editor : Agapito de Deus
