Lafaek News Akontesimentu ai-tohar hanehan sidadaun ida deskonfia ema husi Indonézia ida iha area pertamina dalan ba IOB Pantai Kelapa, wainhira ho motorizada diresaun Pantai Kelapa ba Timor Plaza.
Akontesimentu ne’e iha oras 12 : 53, bainhira sidadaun Indonézia halai hela viajen ho motirizadas (mesak) nune’e too iha area besik pertamina Pantai Kelapa, derepente anin boot baku ai-tohar ba estrada klaran hanehan kedan motorizadas ne’ebé uza husi sidadaun Indonézia ne’e.
Iha akontesimentu ne’e komunidade sira halai sai hotu ba estrada hodi haree ema ida ne’ebé latan an iha ai-matan dukur nia okos, haree ba sidadaun Indonézia ne’e latan hela iha ai nia okos, komunidade sira oferese tais no hena hodi taka netik nia isin.
Liu tiha minutu balun ambulánsia too kedan iha fatin akontesimentu hodi evakua vítima ba Hospital Nasional Guido Valadares hodi hala’o tratamentu urjénsia.
Tuir informasaun husi komunidade ida iha area refere (lakohi publika identidade), haktuir ba Lafaek News katak, sidadaun ne’e ema Indonézia no sidadaun refere foin fila husi nia servisu fatin, derepente ai tohar hanehan sidadaun refere.
“Vítima ne’e ema Indonézia, nia ho motor halai mai pas ai ne’e mos tohar, nia kondisaun ami haree hanesan iis laiha ona, maibé lori ba hospital, haktuir komunidade lakohi publika nia identidade ba Lafaek News iha Pantai Kelapa, kuarta (18/12/2024).
Observasaun jornalista Lafaek News iha fatin akontesimentu nota wanhira ai-hanehan sidadun ho pankada makas, no halakon kedan vítima nia iis lakon iha fatin akontesimentu.
Jornalista Magan : Natalia de Jesus
Editor : Agapito de Deus
