Lafaek News—Diretor Organizasaun Noun Governamentál (ONG) Luta Hamutuk (LH), José Alves da Costa, husu ba deputadus VI Lejislatura ne’ebé ho kualifikasaun diak, bainhira debate OJE kada tinan deputadu sira labele Yes-Yes Man de’it.
“Ita mos hakarak distintus deputadus foun sira mai ho kualidade bainhira iha debate orsamentu estadu kada ano mai ho kualidade ne’ebé mak diak labele mai hanesan Yes Man de’it. la entende sasan até hanesan V lejislatura dehan balun la hatene uza komputador ne’e oinsá ita atu bele interpretasaun se bainhira iha lei ruma iha proposta OJE,” katak José Alves da Costa ba jornalista sira iha Hotel Timor foin lalais.
Maibé José fundamenta, sosiedade sivil ho povu Timor Leste ninia esperansa la mihis iha governasaun da-sia ne’ebé sei lidera husi Kay Rala Xanana Gusmão, maibé presija deputedu ne’ebé kualifikada atu defende duni povu nia interese, la’os sira nia interese, la’os polítiku sira nia interese, ida nee mak nia esperansa ba VI lejislatura.
“Tenke hanoin katak iha rai ne’e ita nia povu sei kiak hela, labele hanoin uluk sira nia kabun ne’e ita nia mesajen ba sira, ha’u mos haree katak Prezidente Repúblika komesa ko’alia kona-ba pensaun vitalísia espera katak VII lejislatura ida ne’e bele fo konsiderasaun primeiro mandatu mak tenke halakon lei pensaun vitalísia ne’e,” katak José Alves da Costa.
Nia dehan, deputadu foun iha kualidade selesionadu liu husi partidu hodi tur iha parlamentu nasional lidera governu da-sia, la presija fo formasaun tanba sira ne’e formando ona husi sira nia partidu mak mai, laiha deputadu ida mak kaer iha dalan mai, se karik kaer iha dalan mak mai sai deputadu ne’e atu lori nasaun ba ne’ebé.
Partidu mak direitu fo avaliasaun katak deputadu ne’e ladi’ak presija troka tenke troka, la’os deputadu permanente tinan lima ne’e hanoin sira mak matenek liu ko’alia ga la ko’alia mos nafatin de’it ka tinan lima-lima ne’e ema ne’e mak nafatin hela de’it interese ba povu nee laiha.
“Hau hanoin parlamentu nasional iha nia funsaun ne’e tolu kompri mak ida nee liu-liu durante saida sosiedade sivil hare iha fiskalizasaun,ita iha problema iha fiskalizasaun deputadu sira simu tiha kareta foun kareta diak kualidade aas folin aas mai nunka halo fiskalizasaun, agora ida nee mak sai hanesan ita nia preokupasaun durante nee,ema hakilar konaba bee mos,ema hakilar konaba sasan folin sae ema hakilar konaba setor saude maibe laiha deputadu ida mak representa sai hanesan matan tilun ibun povu ida nee atu koalia bei-beik iha parlamentu ba mak koalia konaba sira nia viagem atu ba ne’ebé,ligasaun servisu parlamentu nasaun ne’ebé ida nee mak sira nia agenda laos koalia konaba povu ninia preokupasaun bainhira ami sosiedade civil ba halo intervensaun sira mak preokupa fali nusa mak sosiedade civil mak halo fali,” diretor LH ne’e hakotu.
Jornalisra : Arnaldo Nunes
Editor : Agapito de Deus
