Lafaek News—Centru Nacional Chega (CNC,IP.), sesta (21/03/3035), ofisialmente asina akordu ho memorial munisipal tolu hanesan muzéu memorial munisípiu Aileu, Covalima no Bobonaru.
Iha selebrasaun akordu ne’e, Diretor Centru Nacional Chega, Hugo Maria Fernandes, esplika akordu ida ne’e atu muzéu memorial munisipal sira kontinua dezenvolve atividade sira atu Juventude munisipal sira bele lee istória ne’ebé uluk luta nain sira rai hela.
“Apoiu tékniku ne’e iha finanseiru ida ba servisu iha terrenu ho apoiu ne’e ba tinan ida ne’e muzéu memorial sira kontinua dezenvolve instituisaun ho atividade ne’ebe sira bele halo, liliu iha ámbitu dokumenta arkiva memorial sira iha munisípiu liu-liu ema sira ne’ebe partisipa iha luta ba ukun rasik-an,” Hugo Fernandes salienta.
Hugo relata, dezenvolvimentu muzéu memoral iha munisípiu tolu ne’e atu hafasil joven liu-liu estudante sira bele lee istória husi luta nain sira nian.
Representante muzéu memorial municipal, Maria Carvalho Amaral “Bi-kait” apoiu ne’ebé CNC,IP. Bele tulun programa muzéu munisipal nian ne’ebe rekoilla memoria veteranus ema rejistensia sira sobre istória 1974 to 1999.
“CNC nia apoiu ida ne’e ba ami nia programa muzéu hanesan rekoilla memoria Ita nia veteranus sira ema rejistensia sira sobrevivente no vítima sira ne’ebe mai husi 1974 ate 1999 nian,” nia haktuir.
Tuir nia iha munisípiu Covalima tinan ida ne’e sei aumenta tan sítiu istóriku ne’ebé importante hodi lori Juventude no estudante sira ba vizita
“Muzéu munisipal Covalima nain tinan ne’e ami aumenta sítiu istoria sira ida n’ee importante tanba muzéu ne’e atu preserva memorial no istória, Ami nia hanoin ida atu lori joventude ou Jerasaun foun tenki ba vizita fatin istóriku sira katak ita nia rai ne’e ohin loron hetan liberdade duni liu husi istória pasadu mak Ita hetan liberdade ida ne’e,”Nia hateten
Entretantu, apoiu ne’ebé husi Centru Nasional Chega,IP. ba kada muzéu memorial munisipal sei hetan orsamentu hamutuk $14,000,00. No iha tempu tuir mai CNC mos sei planu harii tan muzéu memorial iha munisípiu seluk.
Jornalista : Maria José
Editor : Agapito de Deus
