Lafaek News—Segunda (23/11/2020, Centru Nasionál Chega estabelese akordu formal ho oitavu governu konstitusionál liu husi Ministériu Turizmu Komérsiu Indústria (MTCI), hodi dezenvolve fatin istoriku iha rai laran.
“Bainhira Ita ko’alia kona-ba reparasaun ne’e forma oi-oin forma kolektiva no forma pesoal agora nota entendimentu ne’e se ita haree ba rekomendasaun ne’e primeriu ita hari fila-fali fatin sira ne’ebe uluk violasaun direitus humanus sira akontese,” Diretór CNC Hugo Maria Fernandes ba jornalista sira hafoin asina akordu entre CNC ho MTCI iha edefísiu CNC Balide Dili, segunda semana ne’e.
“Entaun Ita halo reparasaun ida forma kolektiva ida segundu ita preserva nafatin sira ne’e para depois fo hanoin nafatin ita nia entidade públiku sira governante sira no mos liu-liu ba edukasaun Jerasaun foun, ha’u hanoin Chega nia rekomendasoes ne’e klaru atu hala’o programa boot ba sobrevivente sira ne’e reparasaun,” katak Hugo Fernandes.
Nai dehan presiza hakbiit sobrevivente sira nia moris, tan ne’e presiza haree poténsia husi fatin istóriku sira hodi halo investimentu iha setór ekonomia.
“Terseriu maka husi programa reparasaun ne’e klaru ita tenke hakbit sobrevivente sira nia moris entaun ita hare potensia fo husi fatin historiku sira ne’e mak potensia ba dezenvolvimentu setór ekonomia nian,” katak Hugo.
Entretantu, Ministru Turizmu Komérsiu Indústria (MTCI), José Lucas do Carmo da Silva, haktuir iha ohin MTCI selebra akordu ida ho CNC hanesan momentu istóriku ba instituisaun rua atu bele servisu hamutuk promove turizmu istóriku.
“Ohin ne momentu istóriku ida ba instutuisaun rua mai hamutuk iha ne’e atu Asina nota entendimentu atu servisu hamutuk entre centru chega! I. P ho Ministeriu Turizmu Komersiu no Industria (MTCI)” dehan Ministru Turizmu Komersiu Industria Jose Lucas do Carmo da Silva.
Ministru ne’e dehan, akordu refere merese ba públiku atu hatene oinsá parte govern ho CNC bele implementa rekomendasaun ida ne’ebe husi CVAR ho CVA.
“Ita tenke halo divulgasaun i oinsá ita halo implementasaun ba rekomendasaun ida ne’e mak importante tebes atu hala’o servisu ne’e,” dehan MTCI ne’e.
Jornalista : Zeferino Barreto
Editora : Nelya Barros
