Lafaek News—Prezidente Kámara Komérsiu no Indústria Timor Leste (CCI-TL), Oscar Lima, afirma setór privadu iha kapasidade atu investe too millaun $10, maibé iha impedimentu tanba lei la fó dalan ba emprezáriu nasionál atu halo investimentu.
“Ami iha Kapasidade hakarak halo to’o $10 milloens, maibé dalan limite tiha, nemak ami limite katak dalan ne’e tenke sobu tiha, se lei ida halo atu difikulta no hamate fila fali setór privadu, di’ak liu muda lei ne’e hodi fo benefisiu ba ita nia kompania nasionál sira, kuandu setór privadu nasionál hetan benefisiu ne’e serteja ita sei halo buat ruma iha rai ida ne’e, ” dehan Prezidente CCI-TL Oscar Lima, ba jornalista sira iha salaun Katedarál Dili, sesta, (27/11/2020).
Hodi dehan, asuntu ne’ebé sai obstákulu no kritikál liu ba CCI-TL maka ladún implementa kona-ba prakualifikadu no $1 millaun dollars ba kraik de’it mak ba empresáriu nasionál sira, atu implementa maibé lei ne’e limite liu, entaun labele implementa, no kapasidade setór privadu sira nian hakarak halo to’o $10 milloens dollares maibé baze legal limite.
Tan ne’e iha reuniaun reuniaun annual 2020 ne’e, hodi enkoraza setór privadu sira atu aproveita partisipa programa hirak ne’ebé governu lansa liu-liu iha ámbitu planu rekuperasaun ekonómiku (PRK) nune’e setór privadu bele partisipa di’ak liu ba prosesu dezenvolvimentu nasionál.
Jerente CCI-TL ne’e subliña, emprezáriu sira ne’ebé sai parseiru ba dezenvolvimentu tenke buka halo aprosimasaun ba governu, tanba governu agora loke oportunidade, ba pakote servisu barak, maibé tenke iha responsabilidade hodi responsabiliza ba sasán ne’ebé sira simu, karik simu obras tenke halo ho kualidade ne’ebé atu hatudu katak Timor-oan mós bele, labele ida rua halo ema hotu-hotu naran foer hotu.
Nia mos hatutan, husu atu emprezáriu hotu iha responsabilidade másimu hanesan Timor oan halo buat hotu ho kualidade di’ak, halo servisu tempu de prazu nune’e governu bele iha konfiansa másimu husi governu.
Jornalist : Juvita dos Santos
Editór : Egidio Nono
