Lafaek News–Polísia Nasionál Timor-Leste (PNTL) liu husi Unidade Espesial Batallaun Ordem Publika (BOP) no Kompañia Operasaun Espesial (COE) kaptura tan membru Grupu Arte Marsiál (GAM) PSHT na’in 4 iha area mota Malibaka ne’ebe hakat ilegal fronteira terrestre Timor-Leste ho Indonézia.
“Ohin 18/08/2021 dader ita konsege kaptura tan joven mane nain 4 hamutuk ho evidensia komprovativu sira hanesan farda treinu PSHT nian, iha area fronteira ne’ebe ho intensaun ba sae sabuk iha Indonezia”, esplika Komandante UEP, Superintendente Xefi Polisia Orlando Gomes, ba SRP via telefone, kuarta 18/08/2021.
Komandante UEP, Superintendente Xefe Polisia Orlando Gomes informa, antes nee membru COE ho BOP fo apoiu ba Unidade Patrollamentu Fronteira (UPF), iha liña fronteira Suku Tapo/Memo konsege kaptura tan membru GAM PSHT neebe koko atu hakat liu huai dalan ilegal ba indonesia hodi sae sintu iha ema rain.
Orlando haktuir, joven nain 4 ne’e, iha nain tolu ho inisial EF, LfL no OC, husi Aldeia Atus Suku Gildapil, tama iha 22 jullu 2021 no sae sabuk iha 16 agostu 2021. Enkuantu nain ida seluk ho inisial MA husi Aldeia Coshal, Suku Saburai no sira nain hat ne’e husi Munisipiu Bobonaro.
Nia esplika, BOP no COE halo kapturasaun ba joven mane ne’e, iha loron kuarta dader ne’e, iha Aldeia Huluati, Suku Memo, Postu Administrativu Maliana munisipiu Bobonaru ne’ebe lidera hosi Komandante BOP kompanhia Delta, Inspetor Rosalino do Santos no Komandante pelotaun COE, Inpetor asistente polisia Julio Bosco. (*)
