Lafaek News—Ministériu Saúde (MS) implementa programa liga inan hodi hafasil inan isin rua sira hetan informasaun no lais liu asesu ba fasilidade saúde antes partus.
“Programa ne’e ita hein katak ba oin sei la’o ho di’ak ita hakarak antes partus, sira tenke ba hetan atendementu husi profesionál saúde dala haat no halo mós akompañamentu ba sira bainhira sira partus,” dehan Vice-ministra saúde, Bonifacio Maucoli dos Reis ba jornalista sira iha sentru saúde Komoro, Kinta, 25/02/2021.
Dala barak bebe moris mai mate, tanba la akompañia husi profesional saúde sira no menus informasaun, entaun ho programa ne’e fasil atu hetan sms husi telemovel no asesu ba sentru saúde.
“Programa liga inan nian hanesan inan sira ne’ebé la hetan informasaun sira bele hetan liu husi sms ou telemovel sira ne’e importante ba sira maibé presija mós husi autoridade sira hotu hanesan autoridade lokal no xefi suku xefi adeia sira ho konsensia sira ne’e hotu katak saúde inan ho oan ne’e importante tebes,” nia informa.
Iha fatin hanesn Embaixadór Austrália Peter Roberts, haktuir programa ne’e efetivu no simples bele liga inan isin rua ho pesoal saúde bele fó informasaun ba malu no inan sira bele halo komunikasaun ho pesoal saúde.
“Bele halo ligasaun ba pesoal saúde sira hodi suporta ba inan no oan nia saúde, tinan-tinan Australia servisu hamutuk ho ministériu saúde, hanesan parseriu husi katalpa hodi suporta programa ne’e iha tinan ida australia suporta osan ba programa ne’e hamutuk dolares Milliaun ida, husi milliaun ida bele liga ho inan isin 2 barak,” dehan peter.
Peter Roberts reforsa tan katak ligasaun ho inan isin 2 hamutuk rihun 80, ligasaun pesoal saúde ho inan isin 2, husi tinan 2013 AID mak apoiu, husi tinan 2015-2017, governu Austrália fó apoiu millaun $.8, ba futuru ministériu saúde sei jere programa ne’e.
“Ita hotu hatene programa ne’e di’ak no fó benefisiu ba timor oan ba ina isin 2 sira tanba ne’e ministériu saúde kontinua servisu hamutuk hodi suporta inan isin 2 iha Timor-Leste,” Roberts hakotu.
Jornalista : Sandi Belo
Asisten Editór : Pedro de Almeida
