Lafaek News-(RAEOA)-Autoridade Rejiaun Administrativa Espesial Oe-kusse Ambeno (RAEOA), uza forsa fakar rai-henek iha populasaun kiik nia uma oin hodi nahe estrada diresaun ponte Noefefan ba Citrana.
situasaunn akontese ba familia kbiit laek Domingas Taek hamutuk ho nia inan faluk ho alin nain rua sai vítima ba dezenvolimentu estrada liga hosi Ponte Noefefan ba iha Citrana fronteira ho NTT, uma ne’ebé inan faluk ho alin nain rua ne’e autoridade uza forsa hodi kee ona estrada no fakar ona rai-henek ho kaminota (tronton) iha nia uma sorin-sorin, maibé familia ne’e nafatin hela tanba autoridade RAEOA seidauk fo indimnizasaun.
“Sente tauk tanba agora ha’u haree rasik kareta mos hatun ona rai-henek nahe da-daun iha ha’u nia uma oin kalan mos ha’u la toba hein karau tama toos tanba lutu mos sira sobu hotu,” katak Domingas Taek ba jornalista ekipa Media Tour iha Lifau Pante-Makasar RAEOA, foin lalais.
Domingas dehan, kona-ba indimnizasaun autoridade RAEOA ko’alia katak troka uma ho uma, más too ohin loron seidauk reliaza promesa ne’e, maibé komesa kee ona estrada no fakar rai-henek, selindru mos sama da-daun rai.
“Uma ne’ebé ami iha nain tolu hela ne’e toba fatin, dapur ida no uma lisan ida ne’ebé ha’u nia ama mak hein, tanba ha’u nia apa mate ona iha tempo Indonézia agora ha’u nia ama mak hein, uma lisan ne’e naran Usitako,”katak Domingas Taek,
Domingas mos husu ba governu sentral no autoridade RAEOA atu respeita povu kiik, la signifika rezeita dezenvolvimentu, maibé tenke konsidera povu kiik iha nia moris fatin rasik.
“Ami hanesan povu afetadu ami terus ona , governu bele halo dezenvolimentu, maibé mos tenke hanoin ami sasán agora mai hasusar ami, tanba governu seidauk selu ha’u nia uma, selu hau nia rai, maibé estrada komesa halo ona, estrada ne’e hatudu mos ameasa ha’u hodi hadau ha’u nia rai no estraga ha’u nia uma, agora ami atu hela iha ne’ebé? ami seidauk hatene loos,” dehan Domingas.
Jornalista : Acacio Pinto
Editor : Agapito de Deus
