Lafaek News—Povu atoni oan ne’ebé hela iha kapitál Dili, aldeia 03, kampo Alor sente abandona husi governu ne’ebé la tau matan ba sira iha situasaun pandemia covid-19 no aplikasaun Serka Sanitária(SS) konfinamentu obrigatóriu iha Dili.
Tuir Reprezenta komunidade Atoni Oe-Kuse oan, Jacinto Quelo, informa, nu’udar sidadaun ida iha direitu atu ko’alia sai kona-ba problema ne’ebé mak durante ne’e sira hasoru iha estadu emerjénsia no serka sanitária tanba estadu hare’e de’it maibé la tau matan ba nia sidadaun sira.
“Tempu estadu emerjénsia no serka sanitária ami kumpri protokolu husi ministériu saúde no Organizasaun mundiál saúde(OMS), maibé ami la satisfaz ho governu tanba problema ne’ebé mak ami hasoru ne’e nunka mais tau matan mai ami, menus ai-han, osan laiha, liliu ba estudante sira ne’ebé mak hela iha kost ka (uma aluga) susar atu selu tanba osan laiha,” dehan porta voz Jacinto Quelu ba jornalista sira iha Aitarak Laran, Quinta (29/04/2021).
Nia hatutan, durante implementa EE estudante Oe-cusse oan hela iha Dili la hetan hahan no osan tanba ró hala’o operasaun Oe-kuse Dili, no mós sira ne’ebé halo negosíu hanesan pentolang hodi sosa ai-han maibé kompradores laiha, ho problema hirak ne’e husu ba governu atu tau matan, ho situasaun ne’e aumenta tan dezastre boot ida mak foin dadauk inundasaun estragus komunidade nia hela fatin no sasan barak la aproveita maibé to’o agora la hetan apoiu ruma.
“Ami nia sasan ami lakon buat barak ami tauk no la halo movimentu ba mai i ami nia servisu mós husik hela no pior liu tan mak durante iha inundasaun to’o mai agora governu seidauk tau matan mai ami,” Nia subliña.
Enkuantu nia husu ba nai ulun sira tenke hanoin didiak ba nia povu ki’ik sira tanba nasaun ida iha povu iha máka bolu nasaun, estadu no governu iha tanba povu iha, se povu mate hotu se máka hanaran estadu no governu.
Jornalista : Sandi Belo
Asisten Editór : Pedro de Almeida
