Lafaek News—Organizasaun Noun- Governamentál (NGO) Asosiasaun HAK no membru akompaña husi família matebian ativista Sisto dos Santos “Kene-Kene” hala’o atividade lansamentu ofisial memória Sisto dos Santos “Kene-Kene” iha Komité popular.
“Loron ida ohin ne’e família tomak la’ós de’it Asosiasaun HAK ka ho membru sira de’it, maibé ita nia maluk sira hotu hanesan kolega, amigo ne’ebé mak durante ne’e hamutuk ho Saudozu Sisto dos “Kene-Kene” luta ba iha justisa sosiál, ita hakarak dedika hanoin fila-fali memória hotu ne’ebé mak nia kontribui ba iha sosiadade Timor nian, hamutuk ho saudozu nia família sira, nia espoza, oan, inan.”, hateten Diretór Ezekutivu Asosiasaun HAK Feliciano da Costa Araújo hafoin realiza tribute ba Saudozu Sisto dos Santos “Kene-Kene” no halo lansamentu pintura, iha kampaun Asosiasaun HAK Farol sabado ( 21/04/2023).
Diretór ne’e hateten, Saudozu Kene Kene rai hela, memória ne’ebé saudozu hatudu, dedikasaun saudozu fó, liu-liu hakarak kontribui ba iha povu nia moris diak.
“Ha’u hanoin ita boot sira hotu-hotu hatene katak ninian luta atu fó hanoin hikas fali ba jerasaun sira liu-liu hanesan ami sira ne’ebé servisu iha institutusaun asosiasaun HAK, oinsá atu kontinua fila-fali nia hanoin no nia luta”, katak Diretór HAK Feliciano.
Diretór ne’e haktuir, atividade ne’ebé mak halo iha asosiasaun HAK mak hanesan live Tato husi kolega artista tato ninian, live múzika, atu hanoin fila-fali saudozu nia dedikasaun sira, mini Workshop ko’alia liu ba saudozu nia dedikasaun servisu ninian ba sosiedade ida ne’e.
Iha fatin hanesan, Provedór Direitus Humanus no Justisa (PDHJ), Virgilío Guterres haktuir tan, ohin atu fó ondra ba saudozu Sisto dos Santos luta iha Asosiasaun HAK.
“hanesan mós kolega hanesan entidade ne’ebé defende Direitus Humanus hakarak mai partisipa kolega sira ne’ebé fó atributu hanesan fó ondra ka fó sira nia apresiasaun ba saida mak suadozu Sisto dos Santos husik hela, saudozu husik hela, liu-liu ita sira ne’ebé luta ba justisa, luta kontra injustisa, luta ba defende Direitus Humanus ida ne’e mak importante provedór mai partisipa,” dehan PDHJ Virgilío.
Iha observasaun lafaek news nota iha kampaun Asosiasaun HAK iha atividade lansamentu pintura saudozu Sisto dos Santos hetan partisipasaun másimu husi membru NGO hotu-hotu inklui família matebian.
Entretantu, saudozu Sisto dos Santos “Kene-Kene” hakotu nia jornada ikus iha sesta (17/03/2023) iha Ospitál Nasionál Guido Valadares ( HNGV).
Jornalista : Rita Moniz
Editór : Agapito de Deus
