Lafaek News—Militante Partidu Congresso Nasionál Rekonstrusaun Timorense ( CNRT) hetan tuda husi ema deskoñesidu iha munisípiu Vikeke, nune’e Asia justice and Rights ( AJAR) konsidera líder partidu polítiku sira komesa ona lakon ideia oinsá halo kampañia ho saudavel.

Asia justice and Rights ( AJAR) hato’o asuntu ne’e relasiona ho akontesimentu ne’ebé akontese hafoin kampaña iha kampu futeból Beloi, Munisípiu Viqueque sesta (21/04/2023) militante partidu Congresso Nasionál Reconstrusaun Timorense ( CNRT) hetan tuda husi ema deskoñesidu iha área Loihunu no Makadiki nian.

“Ba ita oinsá atu haree ba oin kazu sira ne’e labele prevene ita tenki refleta hodi husu tanbasá mak buat ne’e akontese, ba ha’u buat ne’e akontese tanba ita nia líder partidu polítiku sira komesa ona lakon ideia oinsá mak atu halo kampañia ne’ebé mak saudavel, lakon tiha ideia ona”, hateten Diretór AJAR José Luis Oliveira iha  edifísiu HAK Farol hafoin partisipa atividade ida kona-ba tribute ba Saudozu Sisto dos Santos, Sabado (22/04/2023).

Diretór ne’e haktuir, Kampaña ne’ebé mak haree akontese foin loron hirak ne’e, iha munisípiu Baucau, Viqueque haree  komesa repete nafatin atitude politika labarik nian, gosta hateten at ema, la’ós ko’alia buat ne’ebé mak  atu halo maibé ataka ema nia personalidade, ataka ema nia karákter.

“Ida ne’e la mentabel tebes ba ita nia líder partidu sira sei repete nafatin, idade avansa fuk mutin ona hahalok hanesan labarik nafatin, ida ne’e lamentabel ba ita jerasaun tuir sira ne’e lamenta tebetebes, kauza ida ne’e, ema sai manas, ema sai radikal hodi ataka fali partidu seluk tanba husi líder sira mak la hatudu ezemplu, la hatudu buat ne’ebé mak di’ak ne’e mak buat ne’e akontese”, katak Diretór AJAR.

Sosiedade Sivil ne’e haktuir, Kampaña ne’e liverdade atu promove an ka atu halo saida de’it, maibé tenke hatene katak ne’e liverdade espresaun iha limites, limites ne’e mak ema nia naran ema nia personalidade labele viola ida ne’e mak akontese.

Iha fatin hanesan Diretór Ezekutivu Luta hamutuk José Alves da Costa haktuir, Militante CNRT hetan kanek iha ulun ne’e atitude ne’e ladi’ak, maske la’ós lider partidu sira mak haruka maibé husu ba partidu polítikus sira hotu kontrola membru, militante simpatizante sira hodi hadok-an husi violénsia

“Provoka ki’ik oan sira hanesan ne’e mak sai boot labele uza fatuk, ai tudik hodi solusiona problema difisiensia ne’ebé mak iha, Husu polísia atu buka tuir”, hateten Diretór Luta Hamutuk José

Entretantu iha okaziaun ne’e mós Sosiedade Sivíl AJAR no Luta Hamutuk husu seguransa liu-liu polísia Nasionál Timor Leste (PNTL)  presiza halo invetigasaun rápida, kaptura ema ne’ebé mak komete krimi prosesu,  se karik ema sira ne’e relasaun ho sira ne’ebé mak halo krimi  nu’udar membru ka nu’udar apoiantes husi partidu ruma CNE tenki fo samada atensaun ba partidu ne’e atu asegura disiplina partidária.

Jornalista : Rita Moniz

Editór       : Agapito de Deus