Lafaek News-Relasiona ho prevensaun Covid-19 ne’ebé iha munisípiu Dili, ho nune’e Polisía Nasionál Timor-Leste (PNTL), hamutuk ho ministériu saude, hala’o pasa revista hodi test swap obrigatoriamente ba sidadaun sira nune’e bele prevene virus da’et husi ema ida ba ema seluk
Portavoz PNTL, Superintendente Xefe, Arnaldo Araujo, informa, PNTL halo pasa revista obriga sidadaun tenke halo test swap tanba lei estadu emerjénsia mak obriga atu kumpri regra hirak ne’e.
“Ita halo hanesan ne’e atu prevene kontamina virus Corona núne’e labele da’et husi ema ida ba ema seluk tanba ne’e mak ita haruka mediku sira halo swap test atu ita bele hatene ema ne’e pozitivu COVID-19 ou lae” dehan Portavoz PNTL, Arnaldo Araújo, ba jornalista liu husi koferensia pers iha Komandu Jeral PNTL kaikoli Dili, Kinta 06/05/2021.
Portavoz Arnaldo esplika, abitante sira ne’ebé liu iha liña PNTL halo pasa revista entaun obriga sidadaun sira tama iha fatin ne’ebé PNTL ho ministériu saúde prepara ona atu halo swap test ida-ne’e la bele rekuza ba asuntu ne’e.
“Rezolusaun governu númeru 15 dehan, sidadaun sidadaun ne’ebé la kumpre regras sira ne’e obrigatóriu sei lori ba kuarentina ne’ebé ministériu saúde prepara ona maibé fatin ida ne’e abitante sira mak selu rasik ba nia kustu,”dehan Arnaldo
Nia rekomenda, husu ba sidadaun sira hotu atu kumpre no tuir test swap ida-ne’e tanba PNTL sei Apoiu maximu ba ministériu saúde atu hala’o swap ba populasaun sira hotu tanba PNTL ho Ekipa saúde sei halo swap test ba sidadaun sira kada Bairu.
“Ita tenke hadomi ita nian aan no hadomi mós ita nia familia uma laran tanba ne’e karik hetan rezultadu pozitivu tenke ba iha fatin izolamentu ne’ebé governu prepara ona,” Nia deklara.
Entretantu portavos PNTL, Arnaldo esplika, sidadaun Timor oan iha teritóriu laran tomak bazeia ba rezolusaun governu númeru 15 katak ema hotu husi Xefe de governu mai to sidadaun baibain iha obrigatóriu tenke tuir test swap tanba ne’e PNTL iha obrigatóriu ba nia membru sira maioria tuir ona test swap tanba sira mós iha liña oin.
Jornalista :Orlando Magno
Asisten editor :Egidio Nono
