Lafaek News—Ana Soares ho idade 22, orijen husi Suku Dukurai, postu administrative Letefoho, munisípiu Ermera, ho nia oan nain tolu (3), hela mesak iha uma baraka hanesan tidin iha bee leten nakdoko bainhira anin huu ho velosidade maka’as, hetok át liután udan tau maka’as sira nain haat sente la seguru iha peregrinasaun moris loro-loron.
Realidade moris hanesan ema kriasaun maromak nian sempre hasoru situasaun di’ak no át, haree ba kondisaun moris Ana Soares ho nia oan nain tolu hasoru, bele dehan kondisaun moris ida be moruk dunik, laen ba Ana no aman ba oan nain tolu ne’ebé idade sei kiik, feto dahuluk tinan 7, feto daruak tinan 5 no oan mane ikun foin tinan 2, maibé aman ba labarik nain tolu ne’e husik hela sira no nia inan moris terus iha Tasi-Tolu JP Bairu-foun Motor Cross.
Ana ho nia oan nain tolu hela iha aldeia 12 de Otobru Suku Komoro Postu Administrativu Dom Aleixo, moris iha ho sofrimentu moruk ne’ebé halakon mos esperansa ba oan nain tolu nia futuru.
“Sente triste tebes tanba hela iha rai lolon ho oan nain tolu (3) de pois udan anin atu halai ba ne’ebe tenke tu’ur deit iha uma laran ho labarik nain tolu fiar deit ba maromak, moris maka hanesan ne’e ona simu de’it ona ho buat ne’ebe fo mai ita. Kona ba hahan karik foos oituan iha entaun tein netik ba oan sira hodi han, se laiha pasiénsia tenke raut rai-metan hodi haknauk netik osan rahun ruma hudi bele aguenta netik hahan ba loron ida nian.”tenik inan Kbi’it Laek Ana Soares”
Bainhira lafaek news dada lia ho inan feton Ana Soares esplika, nia oan nain tolu deside hela dook hosi familia razaun, nia kaben husik hela nia ho oan nain tolu hela mesak iha uma baraka ki’ik ida ne’ebe lokaliza iha laletek Aldeia 12 de Outubro Bairu-foun Motor Cross tasi tolu Dili.
Maske ho kbi’it la to’o atu hatutan moris, maibé Ana Soares nafatin forsa hodi esforsu maka’as hodi raut rai-metan fa’an tutan ba ema seluk atu bele hetan netik osan rahun hodi sosa foos lata ida rua ba oan nain tolu nia kabun.
Maibé, Ana sente forsa la too atu sustenta oan nain tolu ne’e, ikus mai nia deside oan nain rua ba hela ho familia atu kuidado no fõ eskola, ho razaun sofrementu ne’ebe nia hasoru labele atu impede oan sira nia futuru.
Sofrementu ne’ebe Inan feton ne’e hasoru la’os kona de’it ba kestaun ekonomia familiár, maibé durante ne’e mós hasoru hela dezafíus bo’ot kona-bá kondisaun hela fatin ne’ebé mak afeitadu no risku tebes.
Inan feton Ana Soares, ba dau-daun ne’e hela de’it iha baraka oan ida ho medida 4×2 ne’ebé durante ne’e sai hela mahon ba nia rasik ho oan nain tolu. No baraka oan ne’e mós dau-daun ne’e hafutar hela ho rai lolon no mota ki’ik oan ida ne’ebe ameasadu tebes liu-liu iha tempu udan no anin bo’ot.
“Fatin ha’u hela ba ne’e kuandu udan iha tempu kalan entaun ha’u latoba, tamba tauk hela rai keta monu ou rai halai ha’u bele prepara an no bele evakua lalais ba fatin seluk para bele salva an, e ida ne’e ha’u sente triste tebes
Tamba ne’e, Inan feton ne’e husu governu atu tau matan ba nia oan sira nia futuru no kria kondisaun ba nia hela fatin ne’ebé oras ne’e dau-daun ameasadu, maibé autoridade lokál aldeia 12 Novembru seidauk ba identifika família kbiit laek ne’ebé da-daun presiza tebes tulun.
Observasaun lafaek news nota, uma baraka ne’ebé Ana ho nia oan nain tolu horik ba, risku tebes iha tempu udan no anin boot, no iha tempu kalan Ana ho nia oan nain tolu labele deskansa ho di’ak, tanba kondisaun uma la favorese no sempre halo trauma sira bainhira anin ho udan tau maka’s, maske nune’e lafaek news tenta konfirma ho autoridad lokál iha area refere, maibé la konsege tanba xefe aldeia nia númeru kontaktu la ativu.
Jornalista : Natalino C. Lopes
Editor : Marcos da Silva Araújo
