Lafaek News–Prezidente Repúblika José Ramos-Horta hateten, Estadu fó kondekorasaun ba atuál Sekretáriu Estadu Komunikasaun Sosiál Expedito Loro Dias Ximenes, tamba hare’e ba nia kontribuisaun iha mundu jornalismu.
“Kondekora ba Expedito Loro Dias tanba nia Jornalista tinan 40 ona ka’er mídia,” dehan José Ramos-Horta, iha Díli, (13/12/2023).
Ramos-Horta haktuir, Organizasaun sira iha rai liur atu fó apoiu ba mídia no Organizasaun Sosiedade Sivíl iha Timor-Leste, sempre husu koñesimentu husi Xefe Estadu antes fó ajuda.
“Ha’u iha liur instituisaun balun hakarak apoiu mídia iha Timor ida mak STL, iha ONG balun, Governu sira iha liur ne’e Canada, Norwegia sira husu ha’u nia opiniaun, ami simu pedidu atu jornál ida ne’e apoiu ka la apoiu, se ha’u hatete favór apoiu sira,” tenik Laureadu Novel ba Paz ne’e.
José Ramos-Horta mós preokupa, labele tinan-tinan kondekora de’it semak halo parte luta, maibé luta tinan 40 liubá remata iha 2002, restaurasaun independénsia.
Estadu kondekora veteranu oin-oin la’ós kondekora de’it, transferénsia osan ba veteranu sira kuaze biliaun rua, ida ne’e jenerozu liu iha mundu ba veteranu.
“Ita labele tinan-tinan kondekora de’it semak halo parte luta, luta ne’e tinan 40 liubá, remata iha 2002 restaurasaun independénsia. Tanba ne’e iha erói seluk ha’u kondekora professor 100, professor balun kuitadu idade 70 ona professor nafatin, servisu tinan 55 servisu sira ne’e erói, luta ka ka’er kilat ka la ka’er kilat halo parte iha klandestina ha’u la interese ida ne’e, ha’u hare’e nia nu’udar mestre moris ki’ak lo’os,” preokupa Horta.
Iha loron 27, fulan-Novembru tinan ne’e, Xefe Estadu kondekora profesores, veteranu, sidadaun nasionál no internasionál inklui atuál Sekretáriu Estadu Komunikasaun Sosiál, Expedito Dias Ximenes iha Palásiu Nobre Lahane Díli.
Iha loron 28 Novembru, Xefe Estadu kondekora Eis-Prezidente Parlamentu Nasionál Arão Noe, Deputadu David Dias Ximenes, Visé-Primeiru Ministru Mariano Assanami Sabino, Prezidénsia Konsellu Ministru Agio Pereira no Prezidente Repúblika Guiné Bissau Umaro Sissoco Embalo.
Estajiada : Epifania I. Pinto
Editor : Marcos da Silva Araújo
