Lafaek News—Diretór Ezekutivu Asositensia Legal Feto no Labarik (ALFELA), Antonino Marques, afirma loron tersa (01/06/2021), nu’udar loron internasional ba labarik iha mundu inklui Timor Leste, tan ne’e husu governu ho inan-aman atu servisu hamutuk kuida labarik proteze husi ambiente ne’ebé la koresponde ho labarik sira hakarak, tanba futuru nasaun iha sira liman.
“Ita tenke tau interese aas liu ba labarik sira ninia interese sai interese ne’ebé prioridade,” diretór ALFELA Antonino Marques ba Lafaek News iha Balide Dili, segunda (31/05/21).
Diretór ALFELA ne’e salienta, ema hotu presiza apoiu labarik no kuidade sira husi situasaun risku oi-oin, aban tersa (01/06/2021), komemora loron internasiona ba labarik atu bele fanun ema hotu iha mundu ne’e inklui Timor Leste, atu bele fo motivasaun ba labarik sira atu hetan direitu ba edukasaun, saúde no goza sira nia Liberdade tomak.
“Presiza ita hotu nia apoiu no tulun ba labarik sira no kuidadu sira husi situasaun risku oi-oin ne’ebé mak akontese, ne’e duni komemorasaun loron internasional ba labarik bele fanun ita hotu iha Timor no mundu tomak atu bele fó motiva no korajen ba labarik sira hotu bele hetan direitu asesu ba edukasaun, asesu ba saúde, asesu ba sira nia direitu ne’ebé iha hodi bele goza,” afirma diretór ALFELA ne’e.
Tuir nia katak, dala ruma labarik barak mak hasoru violénsia iha sira nia uma laran, entaun nafatin husu ba entidade hanesan governu hodi harii uma mahon ida ne’ebé di’ak tau matan ba vítima feto-labarik sira, governu tenke prioritiza aloka orsamentu no nesesidades bázikus atu nune’e sira bele hela ho fatin ne’ebé dignu no asistensia ba han hemu nafatin iha garantidu.
Iha entrevista ho jornalista lafaek news, lider ALFELA ne’e relata iha kazu violasaun seksuál ka abuzu seksuál akontese dala barak iha komunidade, maibé komunidade sira seidauk hatene kona-ba lei direitu labarik entaun sira taka de’it ba públiku hodi resolve tuir família no kultura nian.
“Ida ne’e sai dezafiu ba labarik sira atu hetan justisa ba problema ne’ebé sira hasoru, tanba menus koñesimentu, menus informasaun husi ita nia komunidade sira, menus sosializasaun de’it, entaun governu nafatin iha responsabiliza atu bele fahe informasaun ba ita nia komunidade sira kona-ba lei atu bele apoia ba vitima labarik ne’e rasik,” diretór ALFELA ne’e hakotu.
Jornalista : Juvita dos Santos
Editór : Agapito de Deus
