Lafaek News-Assosiasaun Jornalista Timor-Lorosa’e (AJTL) servisu hamutuk ho A Just, Sustainable And Inclusive Timor-Leste (OXFAM), Tersa, 16/04/2024, realiza workshop ba jornalisa sira kona-ba media tour ne’ebé sei hala’o iha munisipiu Ermera durante loron tolu.
Presidente Assosiasaun Jornalista Timor-Lorosa’e (AJTL) Zevonia Veira relata, objetivu husi workshop ne’ebé realiza durante loron rua, servisu hamutuk ho Oxfam Timor-Leste hodi realiza media tour iha munisipiu Ermera durante loron tolu, atu nune’e, foti asuntu relevante sira hanesan agrikultura, sosial, Turismu, joven feto no mane, ambiente nomós asuntu difisiensia sira nia kriatividade hodi apoiu ekonomia familia uma laran.
“Antes hala’o media tour, jornalista sira sei partisipa workshop durante loron (2) hodi rona oradores sira husi Organizasaun Naun-Governamental La’o Hamutuk nomós Sekretariu Estadu Formasaun Profesional no Empregu (SEFOPE), iha ne’ebé sei ko’alia kona-ba asuntu setor produtivu no programa seasonal worker, hafoin prepara T.O.R, jornalista sira sei halo kobertura durante loron tolu iha munisipiu Ermera hahú husi loron 18 to’o 20 fulan ne’e”, Zevonia informa.
Nia dehan, husi ida ne’e AJTL, lori jornalista sira ba vizita joven feto no mane iha area rural husi sira nia istória susesu nomós obstakulu ne’ebé sira hasoru iha sira nia moris, tanba ida ne’e, hanesan advokasia ida ba governu ho parlamentu oinsá atu foti solusaun hodi haree problema ne’ebé mak sira hasoru, atu nune’e governu bele kontinua apoiu joven sira ne’e, hodi bele kontinua halo sira nia produtu saida deit mak iha hodi diversifika ekonomia rai laran.
“Ida ne’e mak objetivu importante ne’ebé AJTL ho OXFAM halo, tanba ohin loron ita akompaña jornalista barak mak foti asuntu haree liu ba seremonia sira iha kapital Dili, tanba ne’e mak AJTL ho OXFAM, iha hanoin hodi kria nafatin media tour kada tinan, hodi halibur jornalista sira halo kobertura liga asuntu sira ne’ebé mak iha sosiedade nia laran, haree liu ba setor produtivu sira hanesan hortikultura, kriatividade husi joven feto no mane, LGBTI, ema ho difisiensia nomós ex-traballador sira ne’ebé servisu iha Australia fila mai Timor kontribui saida ona ba sosiedade, tanba ne’e mak jornalista sira halo hodi kolabora ho Oxfam, nune’e fó hanoin ba governu sira hodi tau prioridade ba setor produtivu sira nomós ba joven sira ne’ebé mak kontribui ona sira nia-an no sira la hein, maibé sira kontinua nafatin ba oin tuir buat ne’ebé mak sira halo, husi ida ne’e mak oinsá governu sira bele halo advokasia hodi fasilita no kolabora ho sira kona-ba atividade saida deit mak sira halo iha baze”, nia informa.
Entretantu reprezentante diretor OXFAM iha Timor-Leste, Jude Pereira, informa, nia parte apresia tebes ba koperasaun entre Oxfam ho AJTL, hodi servisu hamutuk realiza media tour, iha ne’ebé haree liu ba asuntu sira hanesan joven feto no mane, komunidade LGBI, ema ho difisiensia nomós traballador sira ne’ebé mak durante ne’e servisu ona iha nasaun Australia no fila mai Timor halo saida ona hodi ajuda fila fali ita nia maluk sira ne’ebé mak susesu nomós seidauk susesu.
“Agradese ba atividade media tour, tanba jornalista sira tun direitamente ba terenu hodi haree realidade saida mak ita nia sosiedade sira hasoru nomós bele hetan dadus balun husi baze, atu nune’e promove nafatin kriatividade saida mak ita nia maluk joven feto no mane, komunidade LGBTI, ema ho difisiensia nomós traballador sira ne’ebé mak servisu ona iha Australia no fila mai halo saida ona iha sosiedade”, Jude Pereira relata.
Husi workshop ne’e rasik, hetan bainak importante rua husi ONG La’o Hamutuk nomós SEFOPE, sai hanesan orador ba atividade refere, alende ne’e mós hetan partisipasaun husi grupu joven nain tolu husi munisipiu Ermera, nune’e mós jornalista sira ne’ebé mak mai husi media eletroniku, imprime no online hamutuk sanulu resin ha’at (14), hodi prepara TOR, iha ne’ebé jornalista sira sei halo kobertura durante loron tolu iha munisipiu Ermera.
Crispin de J. Amaral
Editór : Agapito de Deus
