Lafaek News-Assosiasaun Jornalista Timor-Lorosa’e (AJTL), Kinta, 18/04/2024, ho jornalista sira hala’o konferénsia imprensa iha salaun Oxfam Hudi Laran, hafoin dezloka ba munisipiu Ermera hodi kontinua halo Media Tour.
Presidente AJTL, Zevonia Vieira katak, ohin loron AJTL servisu hamutuk ho OXFAM iha Timor-Leste, kontinua halo media tour iha munisipiu Ermera hodi foti istória joven sira nian ne’ebé mak kontribui liuhusi setor produtivu sira hanesan agrikultura, turismo nomós oinsá promove joven sira ne’ebé mak hala’o servisu iha programa seasonal worker iha Australia.https://www.lafaeknews.tl/ajtl-oxfam-realiza-media-tour-ba-jornalista-tl/
“Antes hala’o media tour iha munisipiu Ermera, ita sei halo konferensia pers ida hodi informa ba públiku kona-ba atividade sira ne’ebé mak ita halo durante loron tolu hahú husi loron 18 to’o 20 fulan ne’e, iha ne’ebé sei ko’alia kona-ba asuntu setor produtivu no programa seasonal worker, asuntu difisiensia nomós kriatividade saida deit mak ita nia maluk feto no mane halo iha sosiedade nia laran, atu nune’e husi buat ne’ebé mak sira halo bele diversifika ba ekonomia familia nomós ba rai ida ne’e, liuliu iha munisipiu Ermera”, Zevonia informa.
Sorin seluk reprezentante diretor OXFAM iha Timor-Leste, Jude Pereira haktuir, Asosiasaun Jornalista Timor-Lorosa’e kontinua fó komitmentu atu servisu hamutuk ho Oxfam hodi hala’o programa media tour ida ne’e, tanba Oxfam ho AJTL, la’os foin mak halo programa media tour, maibé programa media tour ita halo iha tinan rua ka tolu liu ba, hodi kontinua halo kobertura ba joven kriativu sira iha munisipiu nomós iha biban ida ne’e liuhusi projetu Hakfoun, ne’ebé finansia husi DIFAT.
“Liuhusi ida ne’e ita nafatin kontinua hala’o media tour iha munisipiu Ermera, iha ne’ebé ho objetivu atu lori jornalista sira ba munisipiu Ermera hodi halo kobertura kona-ba joven sira ninia kriatividade liga ho investimentu setor agrikultura nomós produtivu sira seluk”, Zevonia releta, alende ne’e mós iha joven balun ne’ebé hetan oportunidade ba programa seasonal worker iha Australia nomós halo kobertura ba sira nia resultadu husi saida mak sira aprende husi seasonal worker ne’e rasik nomós oinsá mak sira kontribui iha komunidade ka fatin ne’ebé mak sira hela ba”, Jude relata.
Nia hatutan, husi programa ne’e rasik importante tebes atu kontinua halo investigasaun ne’ebé kle’an liu tan, atu nune’e bele informa ba politiku nain sira liuliu governu liga ba ema hirak ne’ebé mak foti dezisaun hodi haree kona-ba saida mak potensia hirak ne’ebé joven sira iha area rural, liuliu iha munisipiu Eremera halo, tanba ne’e saida mak governu nia planu atu kontribui ka investe hodi desenvolve diak liu tan sira nia investimentu ne’ebé mak durante ne’e sira halo.
“Prosesu ida ne’e ita halo desde loron liu ba kotuk, molok media tour ida ne’e ita organiza workshop, ita lori ema sira husi SEFOPE, hodi esplika kona-ba informasaun sira ne’ebé liga ho empregu externa nomós joven hira mak envolve iha oportunidade ida ne’e, alende ne’e mós ita konvida Sosiedade Sivil hanesan Lao Hamutuk, atu bele fahe mós informasaun sira liga ho analiza orsamentu ba asuntu agrikultura no setor produtivu sira seluk, husi informasaun hirak ne’e, sai hanesan bukae ida ba jornalista sira antes tun ba kampu hodi haklean liu tan realidade ne’ebé akontese iha terenu”, Jude Pereira relata.
Ikus liu nia sujere,ba jornalista haforte liután informasaun husi maluk joven sira inklui mós grupu feto ho mane, ema ho difisiensia nomós autoridade lokal sira, atu bele konfirma kona-ba relasaun servisu entre joven produtivu sira nomós autoridade lokal sira iha munisipiu, liuliu ministerium relevante sira atu relata informasaun hirak ne’ebé mak ita hetan iha baze hodi halo balansu diak liu ta, atu nune’e diversifika ita nia ekonomia iha ita nia nasaun. Jude Pereira hakotu.
Jornalista : Crispin de J. Amaral
Editór : Agapito de Deus
